૪. દુતિયખતસુત્તં

૪. ‘‘ચતૂસુ, ભિક્ખવે, મિચ્છા પટિપજ્જમાનો બાલો અબ્યત્તો અસપ્પુરિસો ખતં ઉપહતં અત્તાનં પરિહરતિ સાવજ્જો ચ હોતિ સાનુવજ્જો ચ વિઞ્ઞૂનં, બહુઞ્ચ અપુઞ્ઞં પસવતિ. કતમેસુ ચતૂસુ? માતરિ, ભિક્ખવે, મિચ્છા પટિપજ્જમાનો બાલો અબ્યત્તો અસપ્પુરિસો ખતં ઉપહતં અત્તાનં પરિહરતિ, સાવજ્જો ચ હોતિ સાનુવજ્જો ચ વિઞ્ઞૂનં, બહુઞ્ચ અપુઞ્ઞં પસવતિ. પિતરિ, ભિક્ખવે, મિચ્છા પટિપજ્જમાનો…પે… તથાગતે, ભિક્ખવે, મિચ્છા પટિપજ્જમાનો…પે… તથાગતસાવકે, ભિક્ખવે, મિચ્છા પટિપજ્જમાનો બાલો અબ્યત્તો અસપ્પુરિસો ખતં ઉપહતં અત્તાનં પરિહરતિ, સાવજ્જો ચ હોતિ સાનુવજ્જો ચ વિઞ્ઞૂનં, બહુઞ્ચ અપુઞ્ઞં પસવતિ. ઇમેસુ ખો, ભિક્ખવે, ચતૂસુ મિચ્છા પટિપજ્જમાનો બાલો અબ્યત્તો અસપ્પુરિસો ખતં ઉપહતં અત્તાનં પરિહરતિ, સાવજ્જો ચ હોતિ સાનુવજ્જો ચ વિઞ્ઞૂનં, બહુઞ્ચ અપુઞ્ઞં પસવતિ.

‘‘ચતૂસુ, ભિક્ખવે, સમ્મા પટિપજ્જમાનો પણ્ડિતો વિયત્તો સપ્પુરિસો અક્ખતં અનુપહતં અત્તાનં પરિહરતિ, અનવજ્જો ચ હોતિ અનનુવજ્જો ચ વિઞ્ઞૂનં, બહુઞ્ચ પુઞ્ઞં પસવતિ. કતમેસુ ચતૂસુ? માતરિ, ભિક્ખવે, સમ્મા પટિપજ્જમાનો પણ્ડિતો વિયત્તો સપ્પુરિસો અક્ખતં અનુપહતં અત્તાનં પરિહરતિ, અનવજ્જો ચ હોતિ અનનુવજ્જો ચ વિઞ્ઞૂનં, બહુઞ્ચ પુઞ્ઞં પસવતિ. પિતરિ, ભિક્ખવે, સમ્મા પટિપજ્જમાનો…પે… તથાગતે, ભિક્ખવે, સમ્મા પટિપજ્જમાનો…પે… તથાગતસાવકે, ભિક્ખવે, સમ્મા પટિપજ્જમાનો પણ્ડિતો વિયત્તો સપ્પુરિસો અક્ખતં અનુપહતં અત્તાનં પરિહરતિ, અનવજ્જો ચ હોતિ અનનુવજ્જો ચ વિઞ્ઞૂનં, બહુઞ્ચ પુઞ્ઞં પસવતિ. ઇમેસુ ખો, ભિક્ખવે, ચતૂસુ સમ્મા પટિપજ્જમાનો પણ્ડિતો વિયત્તો સપ્પુરિસો અક્ખતં અનુપહતં અત્તાનં પરિહરતિ, અનવજ્જો ચ હોતિ અનનુવજ્જો ચ વિઞ્ઞૂનં, બહુઞ્ચ પુઞ્ઞં પસવતી’’તિ.

‘‘માતરિ પિતરિ ચાપિ, યો મિચ્છા પટિપજ્જતિ;

તથાગતે વા સમ્બુદ્ધે, અથ વા તસ્સ સાવકે;

બહુઞ્ચ સો પસવતિ, અપુઞ્ઞં તાદિસો નરો.

‘‘તાય નં અધમ્મચરિયાય [તાય અધમ્મચરિયાય (સી. સ્યા. કં. પી.)], માતાપિતૂસુ પણ્ડિતા;

ઇધેવ નં ગરહન્તિ, પેચ્ચાપાયઞ્ચ ગચ્છતિ.

‘‘માતરિ પિતરિ ચાપિ, યો સમ્મા પટિપજ્જતિ;

તથાગતે વા સમ્બુદ્ધે, અથ વા તસ્સ સાવકે;

બહુઞ્ચ સો પસવતિ, પુઞ્ઞં એતાદિસો [પુઞ્ઞમ્પિ તાદિસો (સી. સ્યા. કં.)] નરો.

‘‘તાય નં ધમ્મચરિયાય, માતાપિતૂસુ પણ્ડિતા;

ઇધેવ [ઇધ ચેવ (સી.)] નં પસંસન્તિ, પેચ્ચ સગ્ગે પમોદતી’’તિ [સગ્ગે ચ મોદતીતિ (સી.)]. ચતુત્થં;