(૨૦) ૫. અપરપુગ્ગલવગ્ગો

નસેવિતબ્બાદિસુત્તાનિ

૧૯૯. ‘‘દસહિ, ભિક્ખવે, ધમ્મેહિ સમન્નાગતો પુગ્ગલો ન સેવિતબ્બો. કતમેહિ દસહિ? પાણાતિપાતી હોતિ, અદિન્નાદાયી હોતિ, કામેસુમિચ્છાચારી હોતિ, મુસાવાદી હોતિ, પિસુણવાચો હોતિ, ફરુસવાચો હોતિ, સમ્ફપ્પલાપી હોતિ, અભિજ્ઝાલુ હોતિ, બ્યાપન્નચિત્તો હોતિ, મિચ્છાદિટ્ઠિકો હોતિ – ઇમેહિ ખો, ભિક્ખવે, દસહિ ધમ્મેહિ સમન્નાગતો પુગ્ગલો ન સેવિતબ્બો.

‘‘દસહિ, ભિક્ખવે, ધમ્મેહિ સમન્નાગતો પુગ્ગલો સેવિતબ્બો. કતમેહિ દસહિ? પાણાતિપાતા પટિવિરતો હોતિ, અદિન્નાદાના પટિવિરતો હોતિ, કામેસુમિચ્છાચારા પટિવિરતો હોતિ, મુસાવાદા પટિવિરતો હોતિ, પિસુણાય વાચાય પટિવિરતો હોતિ, ફરુસાય વાચાય પટિવિરતો હોતિ, સમ્ફપ્પલાપા પટિવિરતો હોતિ, અનભિજ્ઝાલુ હોતિ, અબ્યાપન્નચિત્તો હોતિ, સમ્માદિટ્ઠિકો હોતિ – ઇમેહિ ખો, ભિક્ખવે, દસહિ ધમ્મેહિ સમન્નાગતો પુગ્ગલો સેવિતબ્બો’’.

૨૦૦-૨૦૯. ‘‘દસહિ, ભિક્ખવે, ધમ્મેહિ સમન્નાગતો પુગ્ગલો ન ભજિતબ્બો…પે… ભજિતબ્બો… ન પયિરુપાસિતબ્બો… પયિરુપાસિતબ્બો… ન પુજ્જો હોતિ… પુજ્જો હોતિ… ન પાસંસો હોતિ… પાસંસો હોતિ… અગારવો હોતિ… ગારવો હોતિ… અપ્પતિસ્સો હોતિ… સપ્પતિસ્સો હોતિ… ન આરાધકો હોતિ… આરાધકો હોતિ… ન વિસુજ્ઝતિ… વિસુજ્ઝતિ… માનં નાધિભોતિ [નાભિભોતિ (સી.) અ. નિ. ૧૦.૧૫૬-૧૬૬] … માનં અધિભોતિ… પઞ્ઞાય ન વડ્ઢતિ… પઞ્ઞાય વડ્ઢતિ…પે….

૨૧૦. ‘‘દસહિ, ભિક્ખવે, ધમ્મેહિ સમન્નાગતો પુગ્ગલો બહું અપુઞ્ઞં પસવતિ… બહું પુઞ્ઞં પસવતિ. કતમેહિ દસહિ? પાણાતિપાતા પટિવિરતો હોતિ, અદિન્નાદાના પટિવિરતો હોતિ, કામેસુમિચ્છાચારા પટિવિરતો હોતિ, મુસાવાદા પટિવિરતો હોતિ, પિસુણાય વાચાય પટિવિરતો હોતિ, ફરુસાય વાચાય પટિવિરતો હોતિ, સમ્ફપ્પલાપા પટિવિરતો હોતિ, અનભિજ્ઝાલુ હોતિ, અબ્યાપન્નચિત્તો હોતિ, સમ્માદિટ્ઠિકો હોતિ – ઇમેહિ ખો, ભિક્ખવે, દસહિ ધમ્મેહિ સમન્નાગતો પુગ્ગલો બહું પુઞ્ઞં પસવતી’’તિ.

અપરપુગ્ગલવગ્ગો પઞ્ચમો.