૭. તતિયઅધમ્મસુત્તં

૧૭૩. ‘‘અધમ્મો ચ, ભિક્ખવે, વેદિતબ્બો ધમ્મો ચ; અનત્થો ચ વેદિતબ્બો અત્થો ચ. અધમ્મઞ્ચ વિદિત્વા ધમ્મઞ્ચ, અનત્થઞ્ચ વિદિત્વા અત્થઞ્ચ યથા ધમ્મો યથા અત્થો તથા પટિપજ્જિતબ્બં.

‘‘કતમો ચ, ભિક્ખવે, અધમ્મો, કતમો ચ ધમ્મો; કતમો ચ અનત્થો, કતમો ચ અત્થો? પાણાતિપાતો, ભિક્ખવે, અધમ્મો; પાણાતિપાતા વેરમણી ધમ્મો; યે ચ પાણાતિપાતપચ્ચયા અનેકે પાપકા અકુસલા ધમ્મા સમ્ભવન્તિ, અયં અનત્થો; પાણાતિપાતા વેરમણિપચ્ચયા ચ અનેકે કુસલા ધમ્મા ભાવનાપારિપૂરિં ગચ્છન્તિ, અયં અત્થો.

‘‘અદિન્નાદાનં, ભિક્ખવે, અધમ્મો; અદિન્નાદાના વેરમણી ધમ્મો… કામેસુમિચ્છાચારો, ભિક્ખવે, અધમ્મો; કામેસુમિચ્છાચારા વેરમણી ધમ્મો… મુસાવાદો, ભિક્ખવે, અધમ્મો; મુસાવાદા વેરમણી ધમ્મો… પિસુણા વાચા, ભિક્ખવે, અધમ્મો; પિસુણાય વાચાય વેરમણી ધમ્મો… ફરુસા વાચા, ભિક્ખવે, અધમ્મો; ફરુસાય વાચાય વેરમણી ધમ્મો… સમ્ફપ્પલાપો, ભિક્ખવે, અધમ્મો; સમ્ફપ્પલાપા વેરમણી ધમ્મો… અભિજ્ઝા, ભિક્ખવે, અધમ્મો; અનભિજ્ઝા ધમ્મો… બ્યાપાદો, ભિક્ખવે, અધમ્મો; અબ્યાપાદો ધમ્મો….

‘‘મિચ્છાદિટ્ઠિ, ભિક્ખવે, અધમ્મો; સમ્માદિટ્ઠિ ધમ્મો; યે ચ મિચ્છાદિટ્ઠિપચ્ચયા અનેકે પાપકા અકુસલા ધમ્મા સમ્ભવન્તિ, અયં અનત્થો; સમ્માદિટ્ઠિપચ્ચયા ચ અનેકે કુસલા ધમ્મા ભાવનાપારિપૂરિં ગચ્છન્તિ, અયં અત્થો.

‘‘‘અધમ્મો ચ, ભિક્ખવે, વેદિતબ્બો ધમ્મો ચ; અનત્થો ચ વેદિતબ્બો અત્થો ચ. અધમ્મઞ્ચ વિદિત્વા ધમ્મઞ્ચ, અનત્થઞ્ચ વિદિત્વા અત્થઞ્ચ યથા ધમ્મો યથા અત્થો તથા પટિપજ્જિતબ્બ’ન્તિ, ઇતિ યં તં વુત્તં, ઇદમેતં પટિચ્ચ વુત્ત’’ન્તિ. સત્તમં.