૪. ઓરિમસુત્તં

૧૭૦. ‘‘ઓરિમઞ્ચ, ભિક્ખવે, તીરં દેસેસ્સામિ પારિમઞ્ચ તીરં. તં સુણાથ…પે… કતમઞ્ચ, ભિક્ખવે, ઓરિમં તીરં, કતમઞ્ચ પારિમં તીરં? પાણાતિપાતો, ભિક્ખવે, ઓરિમં તીરં, પાણાતિપાતા વેરમણી પારિમં તીરં. અદિન્નાદાનં ઓરિમં તીરં, અદિન્નાદાના વેરમણી પારિમં તીરં. કામેસુમિચ્છાચારો ઓરિમં તીરં, કામેસુમિચ્છાચારા વેરમણી પારિમં તીરં. મુસાવાદો ઓરિમં તીરં, મુસાવાદા વેરમણી પારિમં તીરં. પિસુણા વાચા ઓરિમં તીરં, પિસુણાય વાચાય વેરમણી પારિમં તીરં. ફરુસા વાચા ઓરિમં તીરં, ફરુસાય વાચાય વેરમણી પારિમં તીરં. સમ્ફપ્પલાપો ઓરિમં તીરં, સમ્ફપ્પલાપા વેરમણી પારિમં તીરં. અભિજ્ઝા ઓરિમં તીરં, અનભિજ્ઝા પારિમં તીરં. બ્યાપાદો ઓરિમં તીરં, અબ્યાપાદો પારિમં તીરં. મિચ્છાદિટ્ઠિ ઓરિમં તીરં, સમ્માદિટ્ઠિ પારિમં તીરં. ઇદં ખો, ભિક્ખવે, ઓરિમં તીરં, ઇદં પારિમં તીરન્તિ.

‘‘અપ્પકા તે મનુસ્સેસુ, યે જના પારગામિનો;

અથાયં ઇતરા પજા, તીરમેવાનુધાવતિ.

‘‘યે ચ ખો સમ્મદક્ખાતે, ધમ્મે ધમ્માનુવત્તિનો;

તે જના પારમેસ્સન્તિ, મચ્ચુધેય્યં સુદુત્તરં.

‘‘કણ્હં ધમ્મં વિપ્પહાય, સુક્કં ભાવેથ પણ્ડિતો;

ઓકા અનોકમાગમ્મ, વિવેકે યત્થ દૂરમં.

‘‘તત્રાભિરતિમિચ્છેય્ય, હિત્વા કામે અકિઞ્ચનો;

પરિયોદપેય્ય અત્તાનં, ચિત્તક્લેસેહિ પણ્ડિતો.

‘‘યેસં સમ્બોધિયઙ્ગેસુ, સમ્મા ચિત્તં સુભાવિતં;

આદાનપટિનિસ્સગ્ગે, અનુપાદાય યે રતા;

ખીણાસવા જુતિમન્તો, તે લોકે પરિનિબ્બુતા’’તિ. ચતુત્થં;