૫. પઠમસુખસુત્તં

૬૫. એકં સમયં આયસ્મા સારિપુત્તો મગધેસુ વિહરતિ નાલકગામકે. અથ ખો સામણ્ડકાનિ પરિબ્બાજકો યેનાયસ્મા સારિપુત્તો તેનુપસઙ્કમિ; ઉપસઙ્કમિત્વા આયસ્મતા સારિપુત્તેન સદ્ધિં સમ્મોદિ. સમ્મોદનીયં કથં સારણીયં વીતિસારેત્વા એકમન્તં નિસીદિ. એકમન્તં નિસિન્નો ખો સામણ્ડકાનિ પરિબ્બાજકો આયસ્મન્તં સારિપુત્તં એતદવોચ –

‘‘કિં નુ ખો, આવુસો સારિપુત્ત, સુખં, કિં દુક્ખ’’ન્તિ? ‘‘અભિનિબ્બત્તિ ખો, આવુસો, દુક્ખા, અનભિનિબ્બત્તિ સુખા. અભિનિબ્બત્તિયા, આવુસો, સતિ ઇદં દુક્ખં પાટિકઙ્ખં – સીતં ઉણ્હં જિઘચ્છા પિપાસા ઉચ્ચારો પસ્સાવો અગ્ગિસમ્ફસ્સો દણ્ડસમ્ફસ્સો સત્થસમ્ફસ્સો ઞાતીપિ મિત્તાપિ સઙ્ગમ્મ સમાગમ્મ રોસેન્તિ. અભિનિબ્બત્તિયા, આવુસો, સતિ ઇદં દુક્ખં પાટિકઙ્ખં. અનભિનિબ્બત્તિયા, આવુસો, સતિ ઇદં સુખં પાટિકઙ્ખં – ન સીતં ન ઉણ્હં ન જિઘચ્છા ન પિપાસા ન ઉચ્ચારો ન પસ્સાવો ન અગ્ગિસમ્ફસ્સો ન દણ્ડસમ્ફસ્સો ન સત્થસમ્ફસ્સો ઞાતીપિ મિત્તાપિ સઙ્ગમ્મ સમાગમ્મ ન રોસેન્તિ. અનભિનિબ્બત્તિયા, આવુસો, સતિ ઇદં સુખં પાટિકઙ્ખ’’ન્તિ. પઞ્ચમં.