૪. ઉપસમ્પદાસુત્તં

૩૪. ‘‘કતિહિ નુ ખો, ભન્તે, ધમ્મેહિ સમન્નાગતેન ભિક્ખુના ઉપસમ્પાદેતબ્બ’’ન્તિ? ‘‘દસહિ ખો, ઉપાલિ, ધમ્મેહિ સમન્નાગતેન ભિક્ખુના ઉપસમ્પાદેતબ્બં. કતમેહિ દસહિ? ઇધુપાલિ, ભિક્ખુ સીલવા હોતિ, પાતિમોક્ખસંવરસંવુતો વિહરતિ આચારગોચરસમ્પન્નો અણુમત્તેસુ વજ્જેસુ ભયદસ્સાવી, સમાદાય સિક્ખતિ સિક્ખાપદેસુ; બહુસ્સુતો હોતિ સુતધરો સુતસન્નિચયો, યે તે ધમ્મા આદિકલ્યાણા મજ્ઝેકલ્યાણા પરિયોસાનકલ્યાણા સાત્થં સબ્યઞ્જનં કેવલપરિપુણ્ણં પરિસુદ્ધં બ્રહ્મચરિયં અભિવદન્તિ, તથારૂપાસ્સ ધમ્મા બહુસ્સુતા હોન્તિ ધાતા વચસા પરિચિતા મનસાનુપેક્ખિતા દિટ્ઠિયા સુપ્પટિવિદ્ધા; પાતિમોક્ખં ખો પનસ્સ વિત્થારેન સ્વાગતં હોતિ સુવિભત્તં સુપ્પવત્તં સુવિનિચ્છિતં સુત્તસો અનુબ્યઞ્જનસો; પટિબલો હોતિ ગિલાનં ઉપટ્ઠાતું વા ઉપટ્ઠાપેતું વા; પટિબલો હોતિ અનભિરતિં વૂપકાસેતું વા વૂપકાસાપેતું વા; પટિબલો હોતિ ઉપ્પન્નં કુક્કુચ્ચં ધમ્મતો વિનોદેતું; પટિબલો હોતિ ઉપ્પન્નં દિટ્ઠિગતં ધમ્મતો વિવેચેતું; પટિબલો હોતિ અધિસીલે સમાદપેતું; પટિબલો હોતિ અધિચિત્તે સમાદપેતું; પટિબલો હોતિ અધિપઞ્ઞાય સમાદપેતું. ઇમેહિ ખો, ઉપાલિ, દસહિ ધમ્મેહિ સમન્નાગતેન ભિક્ખુના ઉપસમ્પાદેતબ્બ’’ન્તિ. ચતુત્થં.