૨. પાતિમોક્ખટ્ઠપનાસુત્તં

૩૨. ‘‘કતિ નુ ખો, ભન્તે, પાતિમોક્ખટ્ઠપના’’તિ? ‘‘દસ ખો, ઉપાલિ, પાતિમોક્ખટ્ઠપના. કતમે દસ? પારાજિકો તસ્સં પરિસાયં નિસિન્નો હોતિ, પારાજિકકથા વિપ્પકતા હોતિ, અનુપસમ્પન્નો તસ્સં પરિસાયં નિસિન્નો હોતિ, અનુપસમ્પન્નકથા વિપ્પકતા હોતિ, સિક્ખં પચ્ચક્ખાતકો તસ્સં પરિસાયં નિસિન્નો હોતિ, સિક્ખં પચ્ચક્ખાતકકથા વિપ્પકતા હોતિ, પણ્ડકો તસ્સં પરિસાયં નિસિન્નો હોતિ, પણ્ડકકથા વિપ્પકતા હોતિ, ભિક્ખુનિદૂસકો તસ્સં પરિસાયં નિસિન્નો હોતિ, ભિક્ખુનિદૂસકકથા વિપ્પકતા હોતિ – ઇમે ખો, ઉપાલિ, દસ પાતિમોક્ખટ્ઠપના’’તિ. દુતિયં.