૧૩. એકપુગ્ગલવગ્ગો

૧૭૦. ‘‘એકપુગ્ગલો, ભિક્ખવે, લોકે ઉપ્પજ્જમાનો ઉપ્પજ્જતિ બહુજનહિતાય બહુજનસુખાય લોકાનુકમ્પાય અત્થાય હિતાય સુખાય દેવમનુસ્સાનં. કતમો એકપુગ્ગલો? તથાગતો અરહં સમ્માસમ્બુદ્ધો. અયં ખો, ભિક્ખવે, એકપુગ્ગલો લોકે ઉપ્પજ્જમાનો ઉપ્પજ્જતિ બહુજનહિતાય બહુજનસુખાય લોકાનુકમ્પાય અત્થાય હિતાય સુખાય દેવમનુસ્સાન’’ન્તિ.

૧૭૧. ‘‘એકપુગ્ગલસ્સ, ભિક્ખવે, પાતુભાવો દુલ્લભો લોકસ્મિં. કતમસ્સ એકપુગ્ગલસ્સ? તથાગતસ્સ અરહતો સમ્માસમ્બુદ્ધસ્સ. ઇમસ્સ ખો, ભિક્ખવે, એકપુગ્ગલસ્સ પાતુભાવો દુલ્લભો લોકસ્મિ’’ન્તિ.

૧૭૨. ‘‘એકપુગ્ગલો, ભિક્ખવે, લોકે ઉપ્પજ્જમાનો ઉપ્પજ્જતિ અચ્છરિયમનુસ્સો. કતમો એકપુગ્ગલો? તથાગતો અરહં સમ્માસમ્બુદ્ધો. અયં ખો, ભિક્ખવે, એકપુગ્ગલો લોકે ઉપ્પજ્જમાનો ઉપ્પજ્જતિ અચ્છરિયમનુસ્સો’’તિ.

૧૭૩. ‘‘એકપુગ્ગલસ્સ, ભિક્ખવે, કાલકિરિયા બહુનો જનસ્સ અનુતપ્પા [આનુતપ્પા (સી.)] હોતિ. કતમસ્સ એકપુગ્ગલસ્સ? તથાગતસ્સ અરહતો સમ્માસમ્બુદ્ધસ્સ. ઇમસ્સ ખો, ભિક્ખવે, એકપુગ્ગલસ્સ કાલકિરિયા બહુનો જનસ્સ અનુતપ્પા હોતી’’તિ.

૧૭૪. ‘‘એકપુગ્ગલો, ભિક્ખવે, લોકે ઉપ્પજ્જમાનો ઉપ્પજ્જતિ અદુતિયો અસહાયો અપ્પટિમો અપ્પટિસમો અપ્પટિભાગો અપ્પટિપુગ્ગલો અસમો અસમસમો દ્વિપદાનં અગ્ગો. કતમો એકપુગ્ગલો? તથાગતો અરહં સમ્માસમ્બુદ્ધો. અયં ખો, ભિક્ખવે, એકપુગ્ગલો લોકે ઉપ્પજ્જમાનો ઉપ્પજ્જતિ અદુતિયો અસહાયો અપ્પટિમો અપ્પટિસમો અપ્પટિભાગો અપ્પટિપુગ્ગલો અસમો અસમસમો દ્વિપદાનં અગ્ગો’’તિ.

૧૭૫-૧૮૬. ‘‘એકપુગ્ગલસ્સ, ભિક્ખવે, પાતુભાવા મહતો ચક્ખુસ્સ પાતુભાવો હોતિ, મહતો આલોકસ્સ પાતુભાવો હોતિ, મહતો ઓભાસસ્સ પાતુભાવો હોતિ, છન્નં અનુત્તરિયાનં પાતુભાવો હોતિ, ચતુન્નં પટિસમ્ભિદાનં સચ્છિકિરિયા હોતિ, અનેકધાતુપટિવેધો હોતિ, નાનાધાતુપટિવેધો હોતિ, વિજ્જાવિમુત્તિફલસચ્છિકિરિયા હોતિ, સોતાપત્તિફલસચ્છિકિરિયા હોતિ, સકદાગામિફલસચ્છિકિરિયા હોતિ, અનાગામિફલસચ્છિકિરિયા હોતિ, અરહત્તફલસચ્છિકિરિયા હોતિ. કતમસ્સ એકપુગ્ગલસ્સ? તથાગતસ્સ અરહતો સમ્માસમ્બુદ્ધસ્સ. ઇમસ્સ ખો, ભિક્ખવે, એકપુગ્ગલસ્સ પાતુભાવા મહતો ચક્ખુસ્સ પાતુભાવો હોતિ, મહતો આલોકસ્સ પાતુભાવો હોતિ, મહતો ઓભાસસ્સ પાતુભાવો હોતિ, છન્નં અનુત્તરિયાનં પાતુભાવો હોતિ, ચતુન્નં પટિસમ્ભિદાનં સચ્છિકિરિયા હોતિ, અનેકધાતુપટિવેધો હોતિ, નાનાધાતુપટિવેધો હોતિ, વિજ્જાવિમુત્તિફલસચ્છિકિરિયા હોતિ, સોતાપત્તિફલસચ્છિકિરિયા હોતિ, સકદાગામિફલસચ્છિકિરિયા હોતિ, અનાગામિફલસચ્છિકિરિયા હોતિ, અરહત્તફલસચ્છિકિરિયા હોતી’’તિ.

૧૮૭. ‘‘નાહં ભિક્ખવે, અઞ્ઞં એકપુગ્ગલમ્પિ સમનુપસ્સામિ યો એવં તથાગતેન અનુત્તરં ધમ્મચક્કં પવત્તિતં સમ્મદેવ અનુપ્પવત્તેતિ યથયિદં, ભિક્ખવે, સારિપુત્તો. સારિપુત્તો, ભિક્ખવે, તથાગતેન અનુત્તરં ધમ્મચક્કં પવત્તિતં સમ્મદેવ અનુપ્પવત્તેતી’’તિ.

એકપુગ્ગલવગ્ગો તેરસમો.