१. सत्तनगरेसु पञ्ञत्तसिक्खापदं

३३५. एकंसं चीवरं कत्वा, पग्गण्हित्वान अञ्जलिं;

आसीसमानरूपोव [आसिंसमानरूपोव (सी. स्या.)], किस्स त्वं इध मागतो.

द्वीसु विनयेसु ये पञ्ञत्ता;

उद्देसं आगच्छन्ति उपोसथेसु;

कति ते सिक्खापदा होन्ति;

कतिसु नगरेसु पञ्ञत्ता.

भद्दको ते उम्मङ्गो, योनिसो परिपुच्छसि;

तग्घ ते अहमक्खिस्सं, यथासि कुसलो तथा.

द्वीसु विनयेसु ये पञ्ञत्ता;

उद्देसं आगच्छन्ति उपोसथेसु;

अड्ढुड्ढसतानि ते होन्ति;

सत्तसु नगरेसु पञ्ञत्ता.

कतमेसु सत्तसु नगरेसु पञ्ञत्ता;

इङ्घ मे त्वं ब्याकर नं [इङ्घ मे तं ब्याकर (क.)];

तं वचनपथं [तव वचनपथं (स्या.)] निसामयित्वा;

पटिपज्जेम हिताय नो सिया.

वेसालियं राजगहे, सावत्थियञ्च आळवियं;

कोसम्बियञ्च सक्केसु, भग्गेसु चेव पञ्ञत्ता.

कति वेसालियं पञ्ञत्ता, कति राजगहे कता;

सावत्थियं कति होन्ति, कति आळवियं कता.

कति कोसम्बियं पञ्ञत्ता, कति सक्केसु वुच्चन्ति;

कति भग्गेसु पञ्ञत्ता, तं मे अक्खाहि पुच्छितो.

दस वेसालियं पञ्ञत्ता, एकवीस राजगहे कता;

छऊन तीणिसतानि, सब्बे सावत्थियं कता.

छ आळवियं पञ्ञत्ता, अट्ठ कोसम्बियं कता;

अट्ठ सक्केसु वुच्चन्ति, तयो भग्गेसु पञ्ञत्ता.

ये वेसालियं पञ्ञत्ता, ते सुणोहि यथातथं [यथाकथं (सी. स्या. एवमुपरिपि)];

मेथुनविग्गहुत्तरि, अतिरेकञ्च काळकं.

भूतं परम्परभत्तं, दन्तपोनेन [दन्तपोणेन (क.)] अचेलको;

भिक्खुनीसु च अक्कोसो, दसेते वेसालियं कता.

ये राजगहे पञ्ञत्ता, ते सुणोहि यथातथं;

अदिन्नादानं राजगहे, द्वे अनुद्धंसना द्वेपि च भेदा.

अन्तरवासकं रूपियं सुत्तं, उज्झापनेन च पाचितपिण्डं;

गणभोजनं विकाले च, चारित्तं नहानं ऊनवीसति.

चीवरं दत्वा वोसासन्ति, एते राजगहे कता;

गिरग्गचरिया तत्थेव, छन्ददानेन एकवीसति.

ये सावत्थियं पञ्ञत्ता, ते सुणोहि यथातथं;

पाराजिकानि चत्तारि, सङ्घादिसेसा भवन्ति सोळस.

अनियता च द्वे होन्ति, निस्सग्गिया चतुवीसति;

छपञ्ञाससतञ्चेव, खुद्दकानि पवुच्चन्ति.

दसयेव च गारय्हा, द्वेसत्तति च सेखिया;

छऊन तीणिसतानि, सब्बे सावत्थियं कता.

ये आळवियं पञ्ञत्ता, ते सुणोहि यथातथं;

कुटिकोसियसेय्या च, खणने गच्छ देवते;

सप्पाणकञ्च सिञ्चन्ति, छ एते आळवियं कता.

ये कोसम्बियं पञ्ञत्ता, ते सुणोहि यथातथं;

महाविहारो दोवचस्सं, अञ्ञं द्वारं सुराय च;

अनादरियं सहधम्मो, पयोपानेन अट्ठमं.

ये सक्केसु पञ्ञत्ता, ते सुणोहि यथातथं;

एळकलोमानि पत्तो च, ओवादो चेव भेसज्जं.

सूचि आरञ्ञिको चेव, अट्ठेते [छ एते (सब्बत्थ)] कापिलवत्थवे;

उदकसुद्धिया ओवादो, भिक्खुनीसु पवुच्चन्ति.

ये भग्गेसु पञ्ञत्ता, ते सुणोहि यथातथं;

समादहित्वा विसिब्बेन्ति, सामिसेन ससित्थकं.

पाराजिकानि चत्तारि, सङ्घादिसेसानि भवन्ति;

सत्त च निस्सग्गियानि, अट्ठ द्वत्तिंस खुद्दका.

द्वे गारय्हा तयो सेक्खा, छप्पञ्ञास सिक्खापदा;

छसु नगरेसु पञ्ञत्ता, बुद्धेनादिच्चबन्धुना.

छऊन तीणिसतानि, सब्बे सावत्थियं कता;

कारुणिकेन बुद्धेन, गोतमेन यसस्सिना.