१०. दसकवारो

३३०. दस आघातवत्थूनि. दस आघातपटिविनया. दस विनीतवत्थूनि. दसवत्थुका मिच्छादिट्ठि. दसवत्थुका सम्मादिट्ठि. दस अन्तग्गाहिका दिट्ठि. दस मिच्छत्ता. दस सम्मत्ता. दस अकुसलकम्मपथा. दस कुसलकम्मपथा. दस अधम्मिका सलाकग्गाहा. दस धम्मिका सलाकग्गाहा. सामणेरानं दस सिक्खापदानि. दसहङ्गेहि समन्नागतो सामणेरो नासेतब्बो.

दसहङ्गेहि समन्नागतो विनयधरो बालो त्वेव सङ्खं गच्छति – अत्तनो भासपरियन्तं न उग्गण्हाति, परस्स भासपरियन्तं न उग्गण्हाति, अत्तनो भासपरियन्तं अनुग्गहेत्वा परस्स भासपरियन्तं अनुग्गहेत्वा अधम्मेन कारेति, अप्पटिञ्ञाय आपत्तिं न जानाति, आपत्तिया मूलं न जानाति, आपत्तिसमुदयं न जानाति, आपत्तिनिरोधं न जानाति, आपत्तिनिरोधगामिनिं पटिपदं न जानाति.

दसहङ्गेहि समन्नागतो विनयधरो पण्डितो त्वेव सङ्खं गच्छति – अत्तनो भासपरियन्तं उग्गण्हाति, परस्स भासपरियन्तं उग्गण्हाति, अत्तनो भासपरियन्तं उग्गहेत्वा परस्स भासपरियन्तं उग्गहेत्वा धम्मेन कारेति, पटिञ्ञाय आपत्तिं जानाति, आपत्तिया मूलं जानाति, आपत्तिसमुदयं जानाति, आपत्तिनिरोधं जानाति, आपत्तिनिरोधगामिनिं पटिपदं जानाति.

अपरेहिपि दसहङ्गेहि समन्नागतो विनयधरो बालो त्वेव सङ्खं गच्छति – अधिकरणं न जानाति, अधिकरणस्स मूलं न जानाति, अधिकरणसमुदयं न जानाति, अधिकरणनिरोधं न जानाति, अधिकरणनिरोधगामिनिं पटिपदं न जानाति, वत्थुं न जानाति, निदानं [उद्दानं (क.)] न जानाति, पञ्ञत्तिं न जानाति, अनुपञ्ञत्तिं न जानाति, अनुसन्धिवचनपथं न जानाति.

दसहङ्गेहि समन्नागतो विनयधरो पण्डितो त्वेव सङ्खं गच्छति – अधिकरणं जानाति, अधिकरणस्स मूलं जानाति, अधिकरणसमुदयं जानाति, अधिकरणनिरोधं जानाति, अधिकरणनिरोधगामिनिं पटिपदं जानाति, वत्थुं जानाति, निदानं जानाति, पञ्ञत्तिं जानाति, अनुपञ्ञत्तिं जानाति, अनुसन्धिवचनपथं जानाति.

अपरेहिपि दसहङ्गेहि समन्नागतो विनयधरो बालो त्वेव सङ्खं गच्छति – ञत्तिं न जानाति, ञत्तिया करणं न जानाति, न पुब्बकुसलो होति, न अपरकुसलो होति, अकालञ्ञू च होति, आपत्तानापत्तिं न जानाति, लहुकगरुकं आपत्तिं न जानाति, सावसेसानवसेसं आपत्तिं न जानाति, दुट्ठुल्लादुट्ठुल्लं आपत्तिं न जानाति, आचरियपरम्परा खो पनस्स न सुग्गहिता होति न सुमनसिकता न सूपधारिता.

दसहङ्गेहि समन्नागतो विनयधरो पण्डितो त्वेव सङ्खं गच्छति – ञत्तिं जानाति, ञत्तिया करणं जानाति, पुब्बकुसलो होति, अपरकुसलो होति, कालञ्ञू च होति, आपत्तानापत्तिं जानाति, लहुकगरुकं आपत्तिं जानाति, सावसेसानवसेसं आपत्तिं जानाति, दुट्ठुल्लादुट्ठुल्लं आपत्तिं जानाति, आचरियपरम्परा खो पनस्स सुग्गहिता होति सुमनसिकता सूपधारिता.

अपरेहिपि दसहङ्गेहि समन्नागतो विनयधरो बालो त्वेव सङ्खं गच्छति – आपत्तानापत्तिं न जानाति, लहुकगरुकं आपत्तिं न जानाति, सावसेसानवसेसं आपत्तिं न जानाति, दुट्ठुल्लादुट्ठुल्लं आपत्तिं न जानाति, उभयानि खो पनस्स पातिमोक्खानि वित्थारेन न स्वागतानि होन्ति न सुविभत्तानि न सुप्पवत्तीनि न सुविनिच्छितानि सुत्तसो अनुब्यञ्जनसो, आपत्तानापत्तिं न जानाति, लहुकगरुकं आपत्तिं न जानाति, सावसेसानवसेसं आपत्तिं न जानाति, दुट्ठुल्लादुट्ठुल्लं आपत्तिं न जानाति, अधिकरणे च न विनिच्छयकुसलो होति.

दसहङ्गेहि समन्नागतो विनयधरो पण्डितो त्वेव सङ्खं गच्छति – आपत्तानापत्तिं जानाति, लहुकगरुकं आपत्तिं जानाति, सावसेसानवसेसं आपत्तिं जानाति, दुट्ठुल्लादुट्ठुल्लं आपत्तिं जानाति, उभयानि खो पनस्स पातिमोक्खानि वित्थारेन स्वागतानि होन्ति सुविभत्तानि सुप्पवत्तीनि सुविनिच्छितानि सुत्तसो अनुब्यञ्जनसो, आपत्तानापत्तिं जानाति, लहुकगरुकं आपत्तिं जानाति, सावसेसानवसेसं आपत्तिं जानाति, दुट्ठुल्लादुट्ठुल्लं आपत्तिं जानाति, अधिकरणे च विनिच्छयकुसलो होति.

[अ. नि. १०.३३] दसहङ्गेहि समन्नागतो भिक्खु उब्बाहिकाय सम्मन्नितब्बो. दस अत्थवसे पटिच्च तथागतेन सावकानं सिक्खापदं पञ्ञत्तं. दस आदीनवा राजन्तेपुरप्पवेसने. दस दानवत्थूनि. दस रतनानि. दसवग्गो भिक्खुसङ्घो. दसवग्गेन गणेन उपसम्पादेतब्बं. दस पंसुकूलानि. दस चीवरधारणा [चीवरधारणानि (स्या.)]. दसाहपरमं अतिरेकचीवरं धारेतब्बं. दस सुक्कानि. दस इत्थियो. दस भरियायो. वेसालिया दस वत्थूनि दीपेन्ति. दस पुग्गला अवन्दिया. दस अक्कोसवत्थूनि. दसहाकारेहि पेसुञ्ञं उपसंहरति. दस सेनासनानि. दस वरानि याचिंसु. दस अधम्मिकानि पातिमोक्खट्ठपनानि. दस धम्मिकानि पातिमोक्खट्ठपनानि. दसानिसंसा यागुया. दस मंसा अकप्पिया. दस परमानि. दसवस्सेन भिक्खुना ब्यत्तेन पटिबलेन पब्बाजेतब्बं उपसम्पादेतब्बं निस्सयो दातब्बो सामणेरो उपट्ठापेतब्बो. दसवस्साय भिक्खुनिया ब्यत्ताय पटिबलाय पब्बाजेतब्बं उपसम्पादेतब्बं निस्सयो दातब्बो सामणेरी उपट्ठापेतब्बा. दसवस्साय भिक्खुनिया ब्यत्ताय पटिबलाय वुट्ठापनसम्मुति सादितब्बा. दसवस्साय गिहिगताय सिक्खा दातब्बाति.

दसकं निट्ठितं.

तस्सुद्दानं –

आघातं विनयं वत्थु, मिच्छा सम्मा च अन्तगा;

मिच्छत्ता चेव सम्मत्ता, अकुसला कुसलापि च.

सलाका अधम्मा धम्मा, सामणेरा च नासना;

भासाधिकरणञ्चेव, ञत्तिलहुकमेव च.

लहुका गरुका एते, कण्हसुक्का विजानथ;

उब्बाहिका च सिक्खा च, अन्तेपुरे च वत्थूनि.

रतनं दसवग्गो च, तथेव उपसम्पदा;

पंसुकूलधारणा च, दसाहसुक्कइत्थियो.

भरिया दस वत्थूनि, अवन्दियक्कोसेन च;

पेसुञ्ञञ्चेव सेनानि, वरानि च अधम्मिका.

धम्मिका यागुमंसा च, परमा भिक्खु भिक्खुनी;

वुट्ठापना गिहिगता, दसका सुप्पकासिताति.