११. एकादसकवारो

३३१. एकाद पुग्गला अनुपसम्पन्ना न उपसम्पादेतब्बा, उपसम्पन्ना नासेतब्बा. एकादस पादुका अकप्पिया. एकादस पत्ता अकप्पिया. एकादस चीवरानि अकप्पियानि. एकादस यावततियका. भिक्खुनीनं एकादस अन्तरायिका धम्मा पुच्छितब्बा. एकादस चीवरानि अधिट्ठातब्बानि. एकादस चीवरानि न विकप्पेतब्बानि. एकादसे अरुणुग्गमने निस्सग्गियं होति. एकादस गण्ठिका कप्पिया. एकादस विधा [वीथा (स्या.)] कप्पिया. एकादस पथवी अकप्पिया. एकादस पथवी कप्पिया. एकादस निस्सयपटिप्पस्सद्धियो. एकादस पुग्गला अवन्दिया. एकादस परमानि. एकादस वरानि याचिंसु. एकादस सीमादोसा. अक्कोसकपरिभासके पुग्गले एकादसादीनवा पाटिकङ्खा. [अ. नि. ११.१५; मि. प. ४.४.६] मेत्ताय चेतोविमुत्तिया आसेविताय भाविताय बहुलीकताय यानीकताय वत्थुकताय अनुट्ठिताय परिचिताय सुसमारद्धाय एकादसानिसंसा पाटिकङ्खा. सुखं सुपति, सुखं पटिबुज्झति, न पापकं सुपिनं पस्सति, मनुस्सानं पियो होति, अमनुस्सानं पियो होति, देवता रक्खन्ति, नास्स अग्गि वा विसं वा सत्थं वा कमति, तुवट्टं चित्तं समाधियति, मुखवण्णो विप्पसीदति, असम्मूळ्हो कालङ्करोति, उत्तरि अप्पटिविज्झन्तो ब्रह्मलोकूपगो होति – मेत्ताय चेतोविमुत्तिया आसेविताय भाविताय बहुलीकताय यानीकताय वत्थुकताय अनुट्ठिताय परिचिताय सुसमारद्धाय इमे एकादसानिसंसा पाटिकङ्खाति.

एकादसकं निट्ठितं.

तस्सुद्दानं –

नासेतब्बा पादुका च, पत्ता च चीवरानि च;

ततिया पुच्छितब्बा च, अधिट्ठानविकप्पना.

अरुणा गण्ठिका विधा, अकप्पिया च कप्पियं;

निस्सयावन्दिया चेव, परमानि वरानि च;

सीमादोसा च अक्कोसा, मेत्तायेकादसा कताति.

एकुत्तरिकनयो.

तस्सुद्दानं –

एकका च दुका चेव, तिका च चतुपञ्चका;

छसत्तट्ठनवका च, दस एकादसानि च.

हिताय सब्बसत्तानं, ञातधम्मेन तादिना;

एकुत्तरिका विमला, महावीरेन देसिताति.

एकुत्तरिकनयो निट्ठितो.