१. एककवारो

३२१. आपत्तिकरा धम्मा जानितब्बा. अनापत्तिकरा धम्मा जानितब्बा. आपत्ति जानितब्बा. अनापत्ति जानितब्बा. लहुका आपत्ति जानितब्बा. गरुका आपत्ति जानितब्बा. सावसेसा आपत्ति जानितब्बा. अनवसेसा आपत्ति जानितब्बा. दुट्ठुल्ला आपत्ति जानितब्बा. अदुट्ठुल्ला आपत्ति जानितब्बा. सप्पटिकम्मा आपत्ति जानितब्बा. अप्पटिकम्मा आपत्ति जानितब्बा. देसनागामिनी आपत्ति जानितब्बा. अदेसनागामिनी आपत्ति जानितब्बा. अन्तरायिका आपत्ति जानितब्बा. अनन्तरायिका आपत्ति जानितब्बा. सावज्जपञ्ञत्ति आपत्ति जानितब्बा. अनवज्जपञ्ञत्ति आपत्ति जानितब्बा. किरियतो समुट्ठिता आपत्ति जानितब्बा. अकिरियतो समुट्ठिता आपत्ति जानितब्बा. किरियाकिरियतो समुट्ठिता आपत्ति जानितब्बा. पुब्बापत्ति जानितब्बा. अपरापत्ति जानितब्बा. पुब्बापत्तीनं अन्तरापत्ति जानितब्बा. अपरापत्तीनं अन्तरापत्ति जानितब्बा. देसिता गणनूपगा आपत्ति जानितब्बा. देसिता न गणनूपगा आपत्ति जानितब्बा. पञ्ञत्ति जानितब्बा. अनुपञ्ञत्ति जानितब्बा. अनुप्पन्नपञ्ञत्ति जानितब्बा. सब्बत्थपञ्ञत्ति जानितब्बा. पदेसपञ्ञत्ति जानितब्बा. साधारणपञ्ञत्ति जानितब्बा. असाधारणपञ्ञत्ति जानितब्बा. एकतोपञ्ञत्ति जानितब्बा. उभतोपञ्ञत्ति जानितब्बा. थुल्लवज्जा आपत्ति जानितब्बा. अथुल्लवज्जा आपत्ति जानितब्बा. गिहिपटिसंयुत्ता आपत्ति जानितब्बा. न गिहिपटिसंयुत्ता आपत्ति जानितब्बा. नियता आपत्ति जानितब्बा. अनियता आपत्ति जानितब्बा. आदिकरो पुग्गलो जानितब्बो. अनादिकरो पुग्गलो जानितब्बो. अधिच्चापत्तिको पुग्गलो जानितब्बो. अभिण्हापत्तिको पुग्गलो जानितब्बो. चोदको पुग्गलो जानितब्बो. चुदितको पुग्गलो जानितब्बो. अधम्मचोदको पुग्गलो जानितब्बो. अधम्मचुदितको पुग्गलो जानितब्बो. धम्मचोदको पुग्गलो जानितब्बो. धम्मचुदितको पुग्गलो जानितब्बो. नियतो पुग्गलो जानितब्बो. अनियतो पुग्गलो जानितब्बो. अभब्बापत्तिको पुग्गलो जानितब्बो. भब्बापत्तिको पुग्गलो जानितब्बो. उक्खित्तको पुग्गलो जानितब्बो. अनुक्खित्तको पुग्गलो जानितब्बो. नासितको पुग्गलो जानितब्बो. अनासितको पुग्गलो जानितब्बो. समानसंवासको पुग्गलो जानितब्बो. असमानसंवासको पुग्गलो जानितब्बो. ठपनं जानितब्बन्ति.

एककं निट्ठितं.

तस्सुद्दानं –

करा आपत्ति लहुका, सावसेसा च दुट्ठुल्ला;

पटिकम्मदेसना च, अन्तरा वज्जकिरियं.

किरियाकिरियं पुब्बा, अन्तरा गणनूपगा;

पञ्ञत्ति अनानुप्पन्न, सब्बसाधारणा च एकतो [पञ्ञत्तानुप्पन्ना सब्बा, साधारणा च एकतो (स्या.)].

थुल्लगिहिनियता च, आदि अधिच्चचोदको;

अधम्मधम्मनियतो, अभब्बोक्खित्तनासिता;

समानं ठपनञ्चेव, उद्दानं एकके इदन्ति.