१६. संसट्ठवारो

३०६. अधिकरणन्ति वा समथाति वा इमे धम्मा संसट्ठा उदाहु विसंसट्ठा? लब्भा च पनिमेसं धम्मानं विनिब्भुजित्वा विनिब्भुजित्वा [विनिब्भुज्जित्वा विनिब्भुज्जित्वा (क.), टीकायं एकपदमेव दिस्सति] नानाकरणं पञ्ञापेतुन्ति?

अधिकरणन्ति वा समथाति वा इमे धम्मा विसंसट्ठा, नो संसट्ठा. लब्भा च पनिमेसं धम्मानं विनिब्भुजित्वा विनिब्भुजित्वा नानाकरणं पञ्ञापेतुन्ति. सो – ‘‘मा हेव’’न्तिस्स वचनीयो. अधिकरणन्ति वा समथाति वा इमे धम्मा संसट्ठा, नो विसंसट्ठा. नो च लब्भा [न च लब्भा (क.)] इमेसं धम्मानं विनिब्भुजित्वा विनिब्भुजित्वा नानाकरणं पञ्ञापेतुं. तं किस्स हेतु? ननु वुत्तं भगवता – ‘‘चत्तारिमानि, भिक्खवे, अधिकरणानि, सत्त समथा. अधिकरणा समथेहि सम्मन्ति, समथा अधिकरणेहि सम्मन्ति. एवं, इमे धम्मा संसट्ठा नो विसंसट्ठा; नो च लब्भा इमेसं धम्मानं विनिब्भुजित्वा विनिब्भुजित्वा नानाकरणं पञ्ञापेतु’’न्ति.

संसट्ठवारो निट्ठितो सोळसमो.