१२. विनयवारो

३०२. विनयो सम्मुखाविनयो, सम्मुखाविनयो विनयो? विनयो येभुय्यसिका, येभुय्यसिका विनयो? विनयो सतिविनयो, सतिविनयो विनयो? विनयो अमूळ्हविनयो, अमूळ्हविनयो विनयो? विनयो पटिञ्ञातकरणं, पटिञ्ञातकरणं विनयो? विनयो तस्सपापियसिका, तस्सपापियसिका विनयो? विनयो तिणवत्थारको, तिणवत्थारको विनयो?

विनयो सिया सम्मुखाविनयो सिया न सम्मुखाविनयो. सम्मुखाविनयो विनयो चेव सम्मुखाविनयो च.

विनयो सिया येभुय्यसिका, सिया न येभुय्यसिका. येभुय्यसिका विनयो चेव येभुय्यसिका च.

विनयो सिया सतिविनयो, सिया न सतिविनयो. सतिविनयो विनयो चेव सतिविनयो च.

विनयो सिया अमूळ्हविनयो, सिया न अमूळ्हविनयो. अमूळ्हविनयो विनयो चेव अमूळ्हविनयो च.

विनयो सिया पटिञ्ञातकरणं, सिया न पटिञ्ञातकरणं. पटिञ्ञातकरणं विनयो चेव पटिञ्ञातकरणञ्च.

विनयो सिया तस्सपापियसिका, सिया न तस्सपापियसिका. तस्सपापियसिका विनयो चेव तस्सपापियसिका च.

विनयो सिया तिणवत्थारको, सिया न तिणवत्थारको. तिणवत्थारको विनयो चेव तिणवत्थारको च.

विनयवारो निट्ठितो द्वादसमो.