२. पाराजिकादिपञ्हा

४८०. इत्थी च अब्भन्तरे सिया,

भिक्खु च बहिद्धा सिया;

छिद्दं तस्मिं घरे नत्थि;

मेथुनधम्मपच्चया;

कथं पाराजिको सिया;

पञ्हा मेसा कुसलेहि चिन्तिता.

तेलं मधुं फाणितञ्चापि सप्पिं;

सामं गहेत्वान निक्खिपेय्य;

अवीतिवत्ते सत्ताहे;

सति पच्चये परिभुञ्जन्तस्स आपत्ति;

पञ्हा मेसा कुसलेहि चिन्तिता.

निस्सग्गियेन आपत्ति;

सुद्धकेन पाचित्तियं;

आपज्जन्तस्स एकतो;

पञ्हा मेसा कुसलेहि चिन्तिता.

भिक्खू सिया वीसतिया समागता;

कम्मं करेय्युं समग्गसञ्ञिनो;

भिक्खु सिया द्वादसयोजने ठितो;

कम्मञ्च तं कुप्पेय्य वग्गपच्चया;

पञ्हा मेसा कुसलेहि चिन्तिता.

पदवीतिहारमत्तेन वाचाय भणितेन च;

सब्बानि गरुकानि सप्पटिकम्मानि;

चतुसट्ठि आपत्तियो आपज्जेय्य एकतो;

पञ्हा मेसा कुसलेहि चिन्तिता.

निवत्थो अन्तरवासकेन;

दिगुणं सङ्घाटिं पारुतो;

सब्बानि तानि निस्सग्गियानि होन्ति;

पञ्हा मेसा कुसलेहि चिन्तिता.

न चापि ञत्ति न च पन कम्मवाचा;

न चेहि भिक्खूति जिनो अवोच;

सरणगमनम्पि न तस्स अत्थि;

उपसम्पदा चस्स अकुप्पा;

पञ्हा मेसा कुसलेहि चिन्तिता.

इत्थिं हने न मातरं, पुरिसञ्च न पितरं हने;

हनेय्य अनरियं मन्दो, तेन चानन्तरं फुसे;

पञ्हा मेसा कुसलेहि चिन्तिता.

इत्थिं हने च मातरं, पुरिसञ्च पितरं हने;

मातरं पितरं हन्त्वा, न तेनानन्तरं फुसे;

पञ्हा मेसा कुसलेहि चिन्तिता.

अचोदयित्वा अस्सारयित्वा;

असम्मुखीभूतस्स करेय्य कम्मं;

कतञ्च कम्मं सुकतं भवेय्य;

कारको च सङ्घो अनापत्तिको सिया;

पञ्हा मेसा कुसलेहि चिन्तिता.

चोदयित्वा सारयित्वा;

सम्मुखीभूतस्स करेय्य कम्मं;

कतञ्च कम्मं अकतं भवेय्य;

कारको च सङ्घो सापत्तिको सिया;

पञ्हा मेसा कुसलेहि चिन्तिता.

छिन्दन्तस्स आपत्ति, छिन्दन्तस्स अनापत्ति;

छादेन्तस्स आपत्ति, छादेन्तस्स अनापत्ति;

पञ्हा मेसा कुसलेहि चिन्तिता.

सच्चं भणन्तो गरुकं, मुसा च लहु भासतो;

मुसा भणन्तो गरुकं, सच्चञ्च लहु भासतो;

पञ्हा मेसा कुसलेहि चिन्तिता.