३. पाचित्तियादिपञ्हा

४८१. अधिट्ठितं रजनाय रत्तं;

कप्पकतम्पि सन्तं;

परिभुञ्जन्तस्स आपत्ति;

पञ्हा मेसा कुसलेहि चिन्तिता.

अत्थङ्गते सूरिये भिक्खु मंसानि खादति;

न उम्मत्तको न च पन खित्तचित्तो;

न चापि सो वेदनाट्टो भवेय्य;

न चस्स होति आपत्ति;

सो च धम्मो सुगतेन देसितो;

पञ्हा मेसा कुसलेहि चिन्तिता.

न रत्तचित्तो न च पन थेय्यचित्तो;

न चापि सो परं मरणाय चेतयि;

सलाकं देन्तस्स होति छेज्जं;

पटिग्गण्हन्तस्स थुल्लच्चयं;

पञ्हा मेसा कुसलेहि चिन्तिता.

न चापि आरञ्ञकं सासङ्कसम्मतं;

न चापि सङ्घेन सम्मुति दिन्ना;

न चस्स कथिनं अत्थतं तत्थेव;

चीवरं निक्खिपित्वा गच्छेय्य अड्ढयोजनं;

तत्थेव अरुणं उग्गच्छन्तस्स अनापत्ति;

पञ्हा मेसा कुसलेहि चिन्तिता.

कायिकानि न वाचसिकानि;

सब्बानि नानावत्थुकानि;

अपुब्बं अचरिमं आपज्जेय्य एकतो;

पञ्हा मेसा कुसलेहि चिन्तिता.

वाचसिकानि न कायिकानि;

सब्बानि नानावत्थुकानि;

अपुब्बं अचरिमं आपज्जेय्य एकतो;

पञ्हा मेसा कुसलेहि चिन्तिता.

तिस्सित्थियो मेथुनं तं न सेवे;

तयो पुरिसे तयो अनरियपण्डके;

न चाचरे मेथुनं ब्यञ्जनस्मिं;

छेज्जं सिया मेथुनधम्मपच्चया;

पञ्हा मेसा कुसलेहि चिन्तिता.

मातरं चीवरं याचे, नो च सङ्घे [नो संघस्स (क.), नो च संघस्स (स्या.), नो चे संघस्स (सी.)] परिणतं;

केनस्स होति आपत्ति, अनापत्ति च ञातके;

पञ्हा मेसा कुसलेहि चिन्तिता.

कुद्धो आराधको होति, कुद्धो होति गरहियो;

अथ को नाम सो धम्मो, येन कुद्धो पसंसियो;

पञ्हा मेसा कुसलेहि चिन्तिता.

तुट्ठो आराधको होति, तुट्ठो होति गरहियो;

अथ को नाम सो धम्मो, येन तुट्ठो गरहियो;

पञ्हा मेसा कुसलेहि चिन्तिता.

सङ्घादिसेसं थुल्लच्चयं;

पाचित्तियं पाटिदेसनीयं;

दुक्कटं आपज्जेय्य एकतो;

पञ्हा मेसा कुसलेहि चिन्तिता.

उभो परिपुण्णवीसतिवस्सा;

उभिन्नं एकुपज्झायो;

एकाचरियो एका कम्मवाचा;

एको उपसम्पन्नो एको अनुपसम्पन्नो;

पञ्हा मेसा कुसलेहि चिन्तिता.

अकप्पकतं नापि रजनाय रत्तं;

तेन निवत्थो येन कामं वजेय्य;

न चस्स होति आपत्ति;

सो च धम्मो सुगतेन देसितो;

पञ्हा मेसा कुसलेहि चिन्तिता.

न देति न पटिग्गण्हाति, पटिग्गहो तेन न विज्जति;

आपज्जति गरुकं न लहुकं, तञ्च परिभोगपच्चया;

पञ्हा मेसा कुसलेहि चिन्तिता.

न देति न पटिग्गण्हाति, पटिग्गहो तेन न विज्जति;

आपज्जति लहुकं न गरुकं, तञ्च परिभोगपच्चया;

पञ्हा मेसा कुसलेहि चिन्तिता.

आपज्जति गरुकं सावसेसं;

छादेति अनादरियं पटिच्च;

न भिक्खुनी नो च फुसेय्य वज्जं;

पञ्हा मेसा कुसलेहि चिन्तिता.

सेदमोचनगाथा निट्ठिता.