१. अविप्पवासपञ्हा

४७९. असंवासो भिक्खूहि च भिक्खुनीहि च;

सम्भोगो एकच्चो तहिं न लब्भति;

अविप्पवासेन अनापत्ति;

पञ्हा मेसा कुसलेहि चिन्तिता.

अविस्सज्जियं अवेभङ्गियं;

पञ्च वुत्ता महेसिना;

विस्सज्जन्तस्स परिभुञ्जन्तस्स अनापत्ति;

पञ्हा मेसा कुसलेहि चिन्तिता.

दस पुग्गले न वदामि, एकादस विवज्जिय;

वुड्ढं वन्दन्तस्स आपत्ति, पञ्हा मेसा कुसलेहि चिन्तिता.

न उक्खित्तको न च पन पारिवासिको;

न सङ्घभिन्नो न च पन पक्खसङ्कन्तो;

समानसंवासकभूमिया ठितो;

कथं नु सिक्खाय असाधारणो सिया;

पञ्हा मेसा कुसलेहि चिन्तिता.

उपेति धम्मं परिपुच्छमानो, कुसलं अत्थूपसञ्हितं;

न जीवति न मतो न निब्बुतो, तं पुग्गलं कतमं वदन्ति बुद्धा;

पञ्हा मेसा कुसलेहि चिन्तिता.

उब्भक्खके न वदामि, अधो नाभिं विवज्जिय;

मेथुनधम्मपच्चया, कथं पाराजिको सिया;

पञ्हा मेसा कुसलेहि चिन्तिता.

भिक्खु सञ्ञाचिकाय कुटिं करोति;

अदेसितवत्थुकं पमाणातिक्कन्तं;

सारम्भं अपरिक्कमनं अनापत्ति;

पञ्हा मेसा कुसलेहि चिन्तिता.

भिक्खु सञ्ञाचिकाय कुटिं करोति;

देसितवत्थुकं पमाणिकं;

अनारम्भं सपरिक्कमनं आपत्ति;

पञ्हा मेसा कुसलेहि चिन्तिता.

न कायिकं किञ्चि पयोगमाचरे;

न चापि वाचाय परे भणेय्य;

आपज्जेय्य गरुकं छेज्जवत्थुं;

पञ्हा मेसा कुसलेहि चिन्तिता.

न कायिकं वाचसिकञ्च किञ्चि;

मनसापि सन्तो न करेय्य पापं;

सो नासितो किन्ति सुनासितो भवे;

पञ्हा मेसा कुसलेहि चिन्तिता.

अनालपन्तो मनुजेन केनचि;

वाचागिरं नो च परे भणेय्य;

आपज्जेय्य वाचसिकं न कायिकं;

पञ्हा मेसा कुसलेहि चिन्तिता.

सिक्खापदा बुद्धवरेन वण्णिता;

सङ्घादिसेसा चतुरो भवेय्युं;

आपज्जेय्य एकपयोगेन सब्बे;

पञ्हा मेसा कुसलेहि चिन्तिता.

उभो एकतो उपसम्पन्ना;

उभिन्नं हत्थतो चीवरं पटिग्गण्हेय्य;

सिया आपत्तियो नाना;

पञ्हा मेसा कुसलेहि चिन्तिता.

चतुरो जना संविधाय;

गरुभण्डं अवाहरुं;

तयो पाराजिका एको न पाराजिको;

पञ्हा मेसा कुसलेहि चिन्तिता.