२. भूतगामवग्गो

१६६. भूतगामं पातेन्तो द्वे आपत्तियो आपज्जति. पातेति, पयोगे दुक्कटं; पहारे पहारे आपत्ति पाचित्तियस्स.

अञ्ञेनञ्ञं पटिचरन्तो द्वे आपत्तियो आपज्जति. अनारोपिते अञ्ञवादके अञ्ञेनञ्ञं पटिचरति, आपत्ति दुक्कटस्स; आरोपिते अञ्ञवादके अञ्ञेनञ्ञं पटिचरति, आपत्ति पाचित्तियस्स.

भिक्खुं उज्झापेन्तो द्वे आपत्तियो आपज्जति. उज्झापेति, पयोगे दुक्कटं; उज्झापिते आपत्ति पाचित्तियस्स.

सङ्घिकं मञ्चं वा पीठं वा भिसिं वा कोच्छं वा अज्झोकासे सन्थरित्वा अनुद्धरित्वा अनापुच्छा पक्कमन्तो द्वे आपत्तियो आपज्जति. पठमं पादं लेड्डुपातं अतिक्कामेति, आपत्ति दुक्कटस्स; दुतियं पादं अतिक्कामेति, आपत्ति पाचित्तियस्स.

सङ्घिके विहारे सेय्यं सन्थरित्वा अनुद्धरित्वा अनापुच्छा पक्कमन्तो द्वे आपत्तियो आपज्जति. पठमं पादं परिक्खेपं अतिक्कामेति, आपत्ति दुक्कटस्स; दुतियं पादं अतिक्कामेति, आपत्ति पाचित्तियस्स.

सङ्घिके विहारे जानं पुब्बुपगतं भिक्खुं अनुपखज्ज सेय्यं कप्पेन्तो द्वे आपत्तियो आपज्जति. निपज्जति, पयोगे दुक्कटं; निपन्ने आपत्ति पाचित्तियस्स.

भिक्खुं कुपितो अनत्तमनो सङ्घिका विहारा निक्कड्ढेन्तो द्वे आपत्तियो आपज्जति. निक्कड्ढति, पयोगे दुक्कटं; निक्कड्ढिते आपत्ति पाचित्तियस्स.

सङ्घिके विहारे उपरिवेहासकुटिया आहच्चपादकं मञ्चं वा पीठं वा अभिनिसीदन्तो द्वे आपत्तियो आपज्जति. अभिनिसीदति, पयोगे दुक्कटं; अभिनिसिन्ने आपत्ति पाचित्तियस्स.

द्वत्तिपरियाये अधिट्ठहित्वा ततुत्तरि अधिट्ठहन्तो द्वे आपत्तियो आपज्जति. अधिट्ठेति, पयोगे दुक्कटं; अधिट्ठिते आपत्ति पाचित्तियस्स.

जानं सप्पाणकं उदकं तिणं वा मत्तिकं वा सिञ्चन्तो द्वे आपत्तियो आपज्जति. सिञ्चति, पयोगे दुक्कटं; सिञ्चिते आपत्ति पाचित्तियस्स.

भूतगामवग्गो दुतियो.