३. ओवादवग्गो

१६७. असम्मतो भिक्खुनियो ओवदन्तो द्वे आपत्तियो आपज्जति. ओवदति, पयोगे दुक्कटं; ओवदिते आपत्ति पाचित्तियस्स.

अत्थङ्गते सूरिये भिक्खुनियो ओवदन्तो द्वे आपत्तियो आपज्जति. ओवदति, पयोगे दुक्कटं; ओवदिते आपत्ति पाचित्तियस्स.

भिक्खुनुपस्सयं उपसङ्कमित्वा भिक्खुनियो ओवदन्तो द्वे आपत्तियो आपज्जति. ओवदति, पयोगे दुक्कटं; ओवदिते आपत्ति पाचित्तियस्स.

‘‘आमिसहेतु भिक्खू भिक्खुनियो ओवदन्ती’’ति भणन्तो द्वे आपत्तियो आपज्जति. भणति, पयोगे दुक्कटं; भणिते आपत्ति पाचित्तियस्स.

अञ्ञातिकाय भिक्खुनिया चीवरं देन्तो द्वे आपत्तियो आपज्जति. देति, पयोगे दुक्कटं; दिन्ने आपत्ति पाचित्तियस्स.

अञ्ञातिका भिक्खुनिया चीवरं सिब्बेन्तो द्वे आपत्तियो आपज्जति. सिब्बेति, पयोगे दुक्कटं; आरापथे आरापथे आपत्ति पाचित्तियस्स.

भिक्खुनिया सद्धिं संविधाय एकद्धानमग्गं पटिपज्जन्तो द्वे आपत्तियो आपज्जति. पटिपज्जति, पयोगे दुक्कटं; पटिपन्ने आपत्ति पाचित्तियस्स.

भिक्खुनिया सद्धिं संविधाय एकं नावं अभिरुहन्तो द्वे आपत्तियो आपज्जति. अभिरुहति, पयोगे दुक्कटं; अभिरुळ्हे आपत्ति पाचित्तियस्स.

जानं भिक्खुनिपरिपाचितं पिण्डपातं भुञ्जन्तो द्वे आपत्तियो आपज्जति. ‘‘भुञ्जिस्सामी’’ति पटिग्गण्हाति, आपत्ति दुक्कटस्स; अज्झोहारे अज्झोहारे आपत्ति पाचित्तियस्स.

भिक्खुनिया सद्धिं एको एकाय रहो निसज्जं कप्पेन्तो द्वे आपत्तियो आपज्जति. निसीदति, पयोगे दुक्कटं; निसिन्ने आपत्ति पाचित्तियस्स.

ओवादवग्गो ततियो.