८. सहधम्मिकवग्गो

१७२. भिक्खूहि सहधम्मिकं वुच्चमानो – ‘‘न तावाहं, आवुसो, एतस्मिं सिक्खापदे सिक्खिस्सामि याव न अञ्ञं भिक्खुं ब्यत्तं विनयधरं परिपुच्छिस्सामी’’ति भणन्तो द्वे आपत्तियो आपज्जति. भणति, पयोगे दुक्कटं; भणिते आपत्ति पाचित्तियस्स.

विनयं विवण्णेन्तो द्वे आपत्तियो आपज्जति. विवण्णेति, पयोगे दुक्कटं; विवण्णिते आपत्ति पाचित्तियस्स.

मोहेन्तो द्वे आपत्तियो आपज्जति. अनारोपिते मोहे मोहेति, आपत्ति दुक्कटस्स; आरोपिते मोहे मोहेति, आपत्ति पाचित्तियस्स.

भिक्खुस्स कुपितो अनत्तमनो पहारं देन्तो द्वे आपत्तियो आपज्जति. पहरति, पयोगे दुक्कटं; पहते आपत्ति पाचित्तियस्स.

भिक्खुस्स कुपितो अनत्तमनो तलसत्तिकं उग्गिरन्तो द्वे आपत्तियो आपज्जति. उग्गिरति, पयोगे दुक्कटं; उग्गिरिते आपत्ति पाचित्तियस्स.

भिक्खुं अमूलकेन सङ्घादिसेसेन अनुद्धंसेन्तो द्वे आपत्तियो आपज्जति. अनुद्धंसेति, पयोगे दुक्कटं; अनुद्धंसिते आपत्ति पाचित्तियस्स.

भिक्खुस्स सञ्चिच्च कुक्कुच्चं उपदहन्तो द्वे आपत्तियो आपज्जति. उपदहति, पयोगे दुक्कटं; उपदहिते आपत्ति पाचित्तियस्स.

भिक्खूनं भण्डनजातानं कलहजातानं विवादापन्नानं उपस्सुतिं तिट्ठन्तो द्वे आपत्तियो आपज्जति. ‘‘सोस्सामी’’ति गच्छति, आपत्ति दुक्कटस्स; यत्थ ठितो सुणाति, आपत्ति पाचित्तियस्स.

धम्मिकानं कम्मानं छन्दं दत्वा पच्छा खीयनधम्मं आपज्जन्तो द्वे आपत्तियो आपज्जति. खिय्यति, पयोगे दुक्कटं; खिय्यिते आपत्ति पाचित्तियस्स.

सङ्घे विनिच्छयकथाय वत्तमानाय छन्दं अदत्वा उट्ठायासना पक्कमन्तो द्वे आपत्तियो आपज्जति. परिसाय हत्थपासं विजहन्तस्स आपत्ति दुक्कटस्स; विजहिते आपत्ति पाचित्तियस्स.

समग्गेन सङ्घेन चीवरं दत्वा पच्छा खीयनधम्मं आपज्जन्तो द्वे आपत्तियो आपज्जति. खिय्यति, पयोगे दुक्कटं; खिय्यिते आपत्ति पाचित्तियस्स.

जानं सङ्घिकं लाभं परिणतं पुग्गलस्स परिणामेन्तो द्वे आपत्तियो आपज्जति. परिणामेति, पयोगे दुक्कटं; परिणामिते आपत्ति पाचित्तियस्स.

सहधम्मिकवग्गो अट्ठमो.