९. राजवग्गो

१७३. पुब्बे अप्पटिसंविदितो रञ्ञो अन्तेपुरं पविसन्तो द्वे आपत्तियो आपज्जति. पठमं पादं उम्मारं अतिक्कामेति, आपत्ति दुक्कटस्स; दुतियं पादं अतिक्कामेति, आपत्ति पाचित्तियस्स.

रतनं उग्गण्हन्तो द्वे आपत्तियो आपज्जति. गण्हाति, पयोगे दुक्कटं; गहिते आपत्ति पाचित्तियस्स.

सन्तं भिक्खुं अनापुच्छा विकाले गामं पविसन्तो द्वे आपत्तियो आपज्जति. पठमं पादं परिक्खेपं अतिक्कामेति, आपत्ति दुक्कटस्स; दुतियं पादं अतिक्कामेति, आपत्ति पाचित्तियस्स.

अट्ठिमयं वा दन्तमयं वा विसाणमयं वा सूचिघरं कारापेन्तो द्वे आपत्तियो आपज्जति. कारापेति, पयोगे दुक्कटं; कारापिते आपत्ति पाचित्तियस्स.

पमाणातिक्कन्तं मञ्चं वा पीठं वा कारापेन्तो द्वे आपत्तियो आपज्जति. कारापेति, पयोगे दुक्कटं; कारापिते आपत्ति पाचित्तियस्स.

मञ्चं वा पीठं वा तूलोनद्धं कारापेन्तो द्वे आपत्तियो आपज्जति. कारापेति, पयोगे दुक्कटं; कारापिते आपत्ति पाचित्तियस्स.

पमाणातिक्कन्तं निसीदनं कारापेन्तो द्वे आपत्तियो आपज्जति. कारापेति, पयोगे दुक्कटं; कारापिते आपत्ति पाचित्तियस्स.

पमाणातिक्कन्तं कण्डुप्पटिच्छादिं कारापेन्तो द्वे आपत्तियो आपज्जति. कारापेति, पयोगे दुक्कटं; कारापिते आपत्ति पाचित्तियस्स.

पमाणातिक्कन्तं वस्सिकसाटिकं कारापेन्तो द्वे आपत्तियो आपज्जति. कारापेति, पयोगे दुक्कटं; कारापिते आपत्ति पाचित्तियस्स.

चीवरं कारापेन्तो कति आपत्तियो आपज्जति? सुगतचीवरप्पमाणं चीवरं कारापेन्तो द्वे आपत्तियो आपज्जति. कारापेति, पयोगे दुक्कटं; कारापिते आपत्ति पाचित्तियस्स – सुगतचीवरप्पमाणं चीवरं कारापेन्तो इमा द्वे आपत्तियो आपज्जति.

राजवग्गो नवमो. खुद्दका निट्ठिता.