५. चित्तागारवग्गो

२३५. राजागारं वा चित्तागारं वा आरामं वा उय्यानं वा पोक्खरणिं वा दस्सनाय गच्छन्ती द्वे आपत्तियो आपज्जति. गच्छति, आपत्ति दुक्कटस्स; यत्थ ठिता पस्सति, आपत्ति पाचित्तियस्स.

आसन्दिं वा पल्लङ्कं वा परिभुञ्जन्ती द्वे आपत्तियो आपज्जति. परिभुञ्जति, पयोगे दुक्कटं; परिभुत्ते, आपत्ति पाचित्तियस्स.

सुत्तं कन्तन्ती द्वे आपत्तियो आपज्जति. कन्तति, पयोगे दुक्कटं; उज्जवुज्जवे, आपत्ति पाचित्तियस्स.

गिहिवेय्यावच्चं करोन्ती द्वे आपत्तियो आपज्जति. करोति, पयोगे दुक्कटं; कते, आपत्ति पाचित्तियस्स.

भिक्खुनिया – ‘‘एहाय्ये इमं अधिकरणं वूपसमेही’’ति वुच्चमाना – ‘‘साधू’’ति पटिस्सुणित्वा नेव वूपसमेन्ती न वूपसमाय उस्सुक्कं करोन्ती एकं आपत्तिं आपज्जति. पाचित्तियं.

अगारिकस्स वा परिब्बाजकस्स वा परिब्बाजिकाय वा सहत्था खादनीयं वा भोजनीयं वा देन्ती द्वे आपत्तियो आपज्जति. देति, पयोगे दुक्कटं; दिन्ने, आपत्ति पाचित्तियस्स.

आवसथचीवरं अनिस्सज्जित्वा परिभुञ्जन्ती द्वे आपत्तियो आपज्जति. परिभुञ्जति, पयोगे दुक्कटं; परिभुत्ते, आपत्ति पाचित्तियस्स.

आवसथं अनिस्सज्जित्वा चारिकं पक्कमन्ती द्वे आपत्तियो आपज्जति. पठमं पादं परिक्खेपं अतिक्कामेति, आपत्ति दुक्कटस्स; दुतियं पादं अतिक्कामेति, आपत्ति पाचित्तियस्स.

तिरच्छानविज्जं परियापुणन्ती द्वे आपत्तियो आपज्जति. परियापुणाति, पयोगे दुक्कटं; पदे पदे आपत्ति पाचित्तियस्स.

तिरच्छानविज्जं वाचेन्ती द्वे आपत्तियो आपज्जति. वाचेति, पयोगे दुक्कटं; पदे पदे आपत्ति पाचित्तियस्स.

चित्तागारवग्गो पञ्चमो.