६. आरामवग्गो

२३६. जानं सभिक्खुकं आरामं अनापुच्छा पविसन्ती द्वे आपत्तियो आपज्जति. पठमं पादं परिक्खेपं अतिक्कामेति, आपत्ति दुक्कटस्स; दुतियं पादं अतिक्कामेति, आपत्ति पाचित्तियस्स.

भिक्खुं अक्कोसन्ती परिभासन्ती द्वे आपत्तियो आपज्जति. अक्कोसति, पयोगे दुक्कटं; अक्कोसिते, आपत्ति पाचित्तियस्स.

चण्डीकता गणं परिभासन्ती द्वे आपत्तियो आपज्जति. परिभासति, पयोगे दुक्कटं; परिभासिते, आपत्ति पाचित्तियस्स.

निमन्तिता वा पवारिता वा खादनीयं वा भोजनीयं वा भुञ्जन्ती द्वे आपत्तियो आपज्जति. ‘‘खादिस्सामि भुञ्जिस्सामी’’ति पटिग्गण्हाति, आपत्ति दुक्कटस्स; अज्झोहारे अज्झोहारे आपत्ति पाचित्तियस्स.

कुलं मच्छरायन्ती द्वे आपत्तियो आपज्जति. मच्छरायति, पयोगे दुक्कटं; मच्छरिते, आपत्ति पाचित्तियस्स.

अभिक्खुके आवासे वस्सं वसन्ती द्वे आपत्तियो आपज्जति. ‘‘वस्सं वसिस्सामी’’ति सेनासनं पञ्ञपेति पानीयं परिभोजनीयं उपट्ठपेति परिवेणं सम्मज्जति, आपत्ति दुक्कटस्स; सह अरुणुग्गमना आपत्ति पाचित्तियस्स.

वस्संवुट्ठा भिक्खुनी उभतोसङ्घे तीहि ठानेहि न पवारेन्ती एकं आपत्तिं आपज्जति. पाचित्तियं.

ओवादाय वा संवासाय वा न गच्छन्ती एकं आपत्तिं आपज्जति. पाचित्तियं.

उपोसथम्पि न पुच्छन्ती ओवादम्पि न याचन्ती एकं आपत्तिं आपज्जति. पाचित्तियं.

पसाखे जातं गण्डं वा रुधितं वा अनपलोकेत्वा सङ्घं वा गणं वा पुरिसेन सद्धिं एकेनेका भेदापेन्ती द्वे आपत्तियो आपज्जति. भेदापेति, पयोगे दुक्कटं; भिन्ने, आपत्ति पाचित्तियस्स.

आरामवग्गो छट्ठो.