४. तुवट्टवग्गो

२३४. द्वे भिक्खुनियो एकमञ्चे तुवट्टेन्तियो द्वे आपत्तियो आपज्जन्ति. निपज्जन्ति, पयोगे दुक्कटं; निपन्ने, आपत्ति पाचित्तियस्स.

द्वे भिक्खुनियो एकत्थरणपावुरणा तुवट्टेन्तियो द्वे आपत्तियो आपज्जन्ति. निपज्जन्ति, पयोगे दुक्कटं; निपन्ने, आपत्ति पाचित्तियस्स.

भिक्खुनिया सञ्चिच्च अफासुं करोन्ती द्वे आपत्तियो आपज्जति. करोति, पयोगे दुक्कटं; कते, आपत्ति पाचित्तियस्स.

दुक्खितं सहजीविनिं नेव उपट्ठेन्ती न उपट्ठापनाय उस्सुक्कं करोन्ती एकं आपत्तिं आपज्जति. पाचित्तियं.

भिक्खुनिया उपस्सयं दत्वा कुपिता अनत्तमना निक्कड्ढन्ती द्वे आपत्तियो आपज्जति. निक्कड्ढति, पयोगे दुक्कटं; निक्कड्ढिते, आपत्ति पाचित्तियस्स.

संसट्ठा भिक्खुनी यावततियं समनुभासनाय न पटिनिस्सज्जन्ती द्वे आपत्तियो आपज्जति. ञत्तिया दुक्कटं; कम्मवाचापरियोसाने आपत्ति पाचित्तियस्स.

अन्तोरट्ठे सासङ्कसम्मते सप्पटिभये असत्थिका चारिकं चरन्ती द्वे आपत्तियो आपज्जति. पटिपज्जति, पयोगे दुक्कटं; पटिपन्ने, आपत्ति पाचित्तियस्स.

तिरोरट्ठे सासङ्कसम्मते सप्पटिभये असत्थिका चारिकं चरन्ती द्वे आपत्तियो आपज्जति. पटिपज्जति, पयोगे दुक्कटं; पटिपन्ने, आपत्ति पाचित्तियस्स.

अन्तोवस्सं चारिकं चरन्ती द्वे आपत्तियो आपज्जति. पटिपज्जति, पयोगे दुक्कटं; पटिपन्ने, आपत्ति पाचित्तियस्स.

वस्संवुट्ठा भिक्खुनी चारिकं न पक्कमन्ती एकं आपत्तिं आपज्जति. पाचित्तियं.

तुवट्टवग्गो चतुत्थो.