३. नहानवग्गो

२३३. नग्गा नहायन्ती द्वे आपत्तियो आपज्जति. नहायति, पयोगे दुक्कटं; नहानपरियोसाने आपत्ति पाचित्तियस्स.

पमाणातिक्कन्तं उदकसाटिकं कारापेन्ती द्वे आपत्तियो आपज्जति. कारापेति, पयोगे दुक्कटं; कारापिते, आपत्ति पाचित्तियस्स.

भिक्खुनिया चीवरं विसिब्बेत्वा वा विसिब्बापेत्वा वा नेव सिब्बेन्ती न सिब्बापनाय उस्सुक्कं करोन्ती एकं आपत्तिं आपज्जति. पाचित्तियं.

पञ्चाहिकं सङ्घाटिचारं अतिक्कामेन्ती एकं आपत्तिं आपज्जति. पाचित्तियं. चीवरसङ्कमनीयं धारेन्ती द्वे आपत्तियो आपज्जति. धारेति, पयोगे दुक्कटं; धारिते, आपत्ति पाचित्तियस्स.

गणस्स चीवरलाभं अन्तरायं करोन्ती द्वे आपत्तियो आपज्जति. करोति, पयोगे दुक्कटं; कते, आपत्ति पाचित्तियस्स.

धम्मिकं चीवरविभङ्गं पटिबाहन्ती द्वे आपत्तियो आपज्जति. पटिबाहति, पयोगे दुक्कटं; पटिबाहिते, आपत्ति पाचित्तियस्स.

अगारिकस्स वा परिब्बाजकस्स वा परिब्बाजिकाय वा समणचीवरं देन्ती द्वे आपत्तियो आपज्जति. देति, पयोगे दुक्कटं; दिन्ने, आपत्ति पाचित्तियस्स.

दुब्बलचीवरपच्चासा चीवरकालसमयं अतिक्कामेन्ती द्वे आपत्तियो आपज्जति. अतिक्कामेति, पयोगे दुक्कटं; अतिक्कामिते, आपत्ति पाचित्तियस्स.

धम्मिकं कथिनुद्धारं पटिबाहन्ती द्वे आपत्तियो आपज्जति. पटिबाहति, पयोगे दुक्कटं; पटिबाहिते, आपत्ति पाचित्तियस्स.

नहानवग्गो ततियो.