२४०. अधम्मकम्मादिकथा

३९७. इध पन, भिक्खवे, भिक्खुस्स न होति आपत्ति दट्ठब्बा. तमेनं चोदेति सङ्घो वा सम्बहुला वा एकपुग्गलो वा – ‘‘आपत्तिं त्वं, आवुसो, आपन्नो, पस्ससेतं आपत्ति’’न्ति? सो एवं वदेति – ‘‘नत्थि मे, आवुसो, आपत्ति, यमहं पस्सेय्य’’न्ति. तं सङ्घो आपत्तिया अदस्सने उक्खिपति – अधम्मकम्मं.

इध पन, भिक्खवे, भिक्खुस्स न होति आपत्ति पटिकातब्बा. तमेनं चोदेति सङ्घो वा सम्बहुला वा एकपुग्गलो वा – ‘‘आपत्तिं त्वं, आवुसो, आपन्नो, पटिकरोहि तं आपत्ति’’न्ति. सो एवं वदेति – ‘‘नत्थि मे, आवुसो, आपत्ति, यमयं पटिकरेय्य’’न्ति. तं सङ्घो आपत्तिया अप्पटिकम्मे उक्खिपति – अधम्मकम्मं.

इध पन, भिक्खवे, भिक्खुस्स न होति पापिका दिट्ठि पटिनिस्सज्जेता. तमेनं चोदेति सङ्घो वा सम्बहुला वा एकपुग्गलो वा – ‘‘पापिका ते, आवुसो, दिट्ठि, पटिनिस्सज्जेतं पापिकं दिट्ठि’’न्ति. सो एवं वदेति – ‘‘नत्थि मे, आवुसो, पापिका दिट्ठि, यमहं पटिनिस्सज्जेय्य’’न्ति. तं सङ्घो पापिकाय दिट्ठिया अप्पटिनिस्सग्गे उक्खिपति – अधम्मकम्मं.

इध पन, भिक्खवे, भिक्खुस्स न होति आपत्ति दट्ठब्बा, न होति आपत्ति पटिकातब्बा. तमेनं चोदेति सङ्घो वा सम्बहुला वा एकपुग्गलो वा – ‘‘आपत्तिं त्वं, आवुसो, आपन्नो, पस्ससेतं आपत्ति? पटिकरोहि तं आपत्ति’’न्ति. सो एवं वदेति – ‘‘नत्थि मे, आवुसो, आपत्ति, यमहं पस्सेय्यं. नत्थि मे, आवुसो, आपत्ति, यमहं पटिकरेय्य’’न्ति. तं सङ्घो अदस्सने वा अप्पटिकम्मे वा उक्खिपति – अधम्मकम्मं.

इध पन, भिक्खवे, भिक्खुस्स न होति आपत्ति दट्ठब्बा, न होति पापिका दिट्ठि पटिनिस्सज्जेता. तमेनं चोदेति सङ्घो वा सम्बहुला वा एकपुग्गलो वा – ‘‘आपत्तिं त्वं, आवुसो, आपन्नो, पस्ससेतं आपत्तिं? पापिका ते दिट्ठि, पटिनिस्सज्जेतं पापिकं दिट्ठि’’न्ति. सो एवं वदेति – ‘‘नत्थि मे, आवुसो, आपत्ति, यमहं पस्सेय्यं; नत्थि मे, आवुसो, पापिका दिट्ठि, यमहं पटिनिस्सज्जेय्य’’न्ति. तं सङ्घो अदस्सने वा अप्पटिनिस्सग्गे वा उक्खिपति – अधम्मकम्मं.

इध पन, भिक्खवे, भिक्खुस्स न होति आपत्ति पटिकातब्बा, न होति पापिका दिट्ठि पटिनिस्सज्जेता. तमेनं चोदेति सङ्घो वा सम्बहुला वा एकपुग्गलो वा – ‘‘आपत्तिं त्वं, आवुसो, आपन्नो, पटिकरोहि तं आपत्तिं; पापिका ते दिट्ठि, पटिनिस्सज्जेतं पापिकं दिट्ठि’’न्ति. सो एवं वदेति – ‘‘नत्थि मे, आवुसो, आपत्ति, यमहं पटिकरेय्यं. नत्थि मे, आवुसो, पापिका दिट्ठि, यमहं पटिनिस्सज्जेय्य’’न्ति. तं सङ्घो अप्पटिकम्मे वा अप्पटिनिस्सग्गे वा उक्खिपति – अधम्मकम्मं.

इध पन, भिक्खवे, भिक्खुस्स न होति आपत्ति दट्ठब्बा, न होति आपत्ति पटिकातब्बा, न होति पापिका दिट्ठि पटिनिस्सज्जेता. तमेनं चोदेति सङ्घो वा सम्बहुला वा एकपुग्गलो वा – ‘‘आपत्तिं त्वं, आवुसो, आपन्नो, पस्ससेतं आपत्तिं? पटिकरोहि तं आपत्तिं; पापिका ते दिट्ठि, पटिनिस्सज्जेतं पापिकं दिट्ठि’’न्ति. सो एवं वदेति – ‘‘नत्थि मे, आवुसो, आपत्ति, यमहं पस्सेय्यं. नत्थि मे, आवुसो, आपत्ति, यमहं पटिकरेय्यं. नत्थि मे, आवुसो, पापिका दिट्ठि, यमहं पटिनिस्सज्जेय्य’’न्ति. तं सङ्घो अदस्सने वा अप्पटिकम्मे वा अप्पटिनिस्सग्गे वा उक्खिपति – अधम्मकम्मं.

३९८. इध पन, भिक्खवे, भिक्खुस्स होति आपत्ति दट्ठब्बा. तमेनं चोदेति. सङ्घो वा सम्बहुला वा एकपुग्गलो वा – ‘‘आपत्तिं त्वं, आवुसो, आपन्नो, पस्ससेतं आपत्ति’’न्ति? सो एवं वदेति – ‘‘आमावुसो, पस्सामी’’ति. तं सङ्घो आपत्तिया अदस्सने उक्खिपति – अधम्मकम्मं.

इध पन, भिक्खवे, भिक्खुस्स होति आपत्ति पटिकातब्बा. तमेनं चोदेति सङ्घो वा सम्बहुला वा एकपुग्गलो वा – ‘‘आपत्तिं त्वं, आवुसो, आपन्नो, पटिकरोहि तं आपत्ति’’न्ति. सो एवं वदेति – ‘‘आमावुसो, पटिकरिस्सामी’’ति. तं सङ्घो आपत्तिया अप्पटिकम्मे उक्खिपति – अधम्मकम्मं.

इध पन, भिक्खवे, भिक्खुस्स होति पापिका दिट्ठि पटिनिस्सज्जेता. तमेनं चोदेति सङ्घो वा सम्बहुला वा एकपुग्गलो वा – ‘‘पापिका ते, आवुसो, दिट्ठि; पटिनिस्सज्जेतं पापिकं दिट्ठि’’न्ति. सो एवं वदेति – ‘‘आमावुसो, पटिनिस्सज्जिस्सामी’’ति. तं सङ्घो पापिकाय दिट्ठिया अप्पटिनिस्सग्गे उक्खिपति – अधम्मकम्मं.

इध पन, भिक्खवे, भिक्खुस्स होति आपत्ति दट्ठब्बा, होति आपत्ति पटिकातब्बा…पे… होति आपत्ति दट्ठब्बा, होति पापिका दिट्ठि पटिनिस्सज्जेता…पे… होति आपत्ति पटिकातब्बा, होति पापिका दिट्ठि पटिनिस्सज्जेता…पे… होति आपत्ति दट्ठब्बा, होति आपत्ति पटिकातब्बा, होति पापिका दिट्ठि पटिनिस्सज्जेता. तमेनं चोदेति सङ्घो वा सम्बहुला वा एकपुग्गलो वा – ‘‘आपत्तिं त्वं, आवुसो, आपन्नो, पस्ससेतं आपत्तिं? पटिकरोहि तं आपत्तिं; पापिका ते दिट्ठि, पटिनिस्सज्जेतं पापिकं दिट्ठि’’न्ति. सो एवं वदेति – ‘‘आमावुसो, पस्सामि, आम पटिकरिस्सामि, आम पटिनिस्सज्जिस्सामी’’ति. तं सङ्घो अदस्सने वा अप्पटिकम्मे वा अप्पटिनिस्सग्गे वा उक्खिपति – अधम्मकम्मं.

३९९. इध पन, भिक्खवे, भिक्खुस्स होति आपत्ति दट्ठब्बा. तमेनं चोदेति सङ्घो वा सम्बहुला वा एकपुग्गलो वा – ‘‘आपत्तिं त्वं, आवुसो, आपन्नो, पस्ससेतं आपत्ति’’न्ति? सो एवं वदेति – ‘‘नत्थि मे, आवुसो, आपत्ति, यमहं पस्सेय्य’’न्ति. तं सङ्घो आपत्तिया अदस्सने उक्खिपति – धम्मकम्मं.

इध पन, भिक्खवे, भिक्खुस्स होति आपत्ति पटिकातब्बा. तमेनं चोदेति सङ्घो वा सम्बहुला वा एकपुग्गलो वा – ‘‘आपत्तिं त्वं, आवुसो, आपन्नो, पटिकरोहि तं आपत्ति’’न्ति. सो एवं वदेति – ‘‘नत्थि मे, आवुसो, आपत्ति, यमहं पटिकरेय्य’’न्ति. तं सङ्घो आपत्तिया अप्पटिकम्मे उक्खिपति – धम्मकम्मं.

इध पन, भिक्खवे, भिक्खुस्स होति पापिका दिट्ठि पटिनिस्सज्जेता. तमेनं चोदेति सङ्घो वा सम्बहुला वा एकपुग्गलो वा – ‘‘पापिका ते, आवुसो, दिट्ठि, पटिनिस्सज्जेतं पापिकं दिट्ठि’’न्ति. सो एवं वदेति – ‘‘नत्थि मे, आवुसो, पापिका दिट्ठि, यमहं पटिनिस्सज्जेय्य’’न्ति. तं सङ्घो पापिकाय दिट्ठिया अप्पटिनिस्सग्गे उक्खिपति – धम्मकम्मं.

इध पन, भिक्खवे, भिक्खुस्स होति आपत्ति दट्ठब्बा, होति आपत्ति पटिकातब्बा…पे…

होति आपत्ति दट्ठब्बा, होति पापिका दिट्ठि पटिनिस्सज्जेता…पे… होति आपत्ति पटिकातब्बा, होति पापिका दिट्ठि पटिनिस्सज्जेता …पे… होति आपत्ति दट्ठब्बा, होति आपत्ति पटिकातब्बा, होति पापिका दिट्ठि पटिनिस्सज्जेता. तमेनं चोदेति सङ्घो वा सम्बहुला वा एकपुग्गलो वा – ‘‘आपत्तिं त्वं, आवुसो, आपन्नो, पस्ससेतं आपत्तिं? पटिकरोहि तं आपत्तिं. पापिका ते दिट्ठि, पटिनिस्सज्जेतं पापिकं दिट्ठि’’न्ति. सो एवं वदेति – ‘‘नत्थि मे, आवुसो, आपत्ति, यमहं पस्सेय्यं. नत्थि मे, आवुसो, आपत्ति यमहं पटिकरेय्यं. नत्थि मे, आवुसो, पापिका दिट्ठि, यमहं पटिनिस्सज्जेय्य’’न्ति. तं सङ्घो अदस्सने वा अप्पटिकम्मे वा अप्पटिनिस्सग्गे वा उक्खिपति – धम्मकम्मन्ति.

अधम्मकम्मादिकथा निट्ठिता.