२३९. द्वेनिस्सारणादिकथा

३९५. द्वेमा, भिक्खवे, निस्सारणा. अत्थि, भिक्खवे, पुग्गलो अप्पत्तो निस्सारणं. तञ्चे सङ्घो निस्सारेति, एकच्चो सुनिस्सारितो, एकच्चो दुन्निस्सारितो. कतमो च, भिक्खवे, पुग्गलो अप्पत्तो निस्सारणं, तञ्चे सङ्घो निस्सारेति – दुन्निस्सारितो? इध पन, भिक्खवे, भिक्खु सुद्धो होति अनापत्तिको. तञ्चे सङ्घो निस्सारेति – दुन्निस्सारितो. अयं वुच्चति, भिक्खवे, पुग्गलो अप्पत्तो निस्सारणं, तञ्चे सङ्घो निस्सारेति – दुन्निस्सारितो.

कतमो च, भिक्खवे, पुग्गलो अप्पत्तो निस्सारणं, तञ्चे सङ्घो निस्सारेति – सुनिस्सारितो? इध पन, भिक्खवे, भिक्खु बालो होति अब्यत्तो आपत्तिबहुलो अनपदानो, गिहिसंसट्ठो विहरति अननुलोमिकेहि गिहिसंसग्गेहि, तञ्चे सङ्घो निस्सारेति – सुनिस्सारितो. अयं वुच्चति, भिक्खवे, पुग्गलो अप्पत्तो निस्सारणं, तञ्चे सङ्घो निस्सारेति – सुनिस्सारितो.

३९६. द्वेमा, भिक्खवे, ओसारणा. अत्थि, भिक्खवे, पुग्गलो अप्पत्तो ओसारणं तञ्चे सङ्घो ओसारेति, एकच्चो सोसारितो, एकच्चो दोसारितो. कतमो च, भिक्खवे, पुग्गलो अप्पत्तो ओसारणं, तञ्चे सङ्घो ओसारेति – दोसारितो? पण्डको, भिक्खवे, अप्पत्तो ओसारणं, तञ्चे सङ्घो ओसारेति – दोसारितो. थेय्यसंवासको, भिक्खवे, अप्पत्तो ओसारणं, तञ्चे सङ्घो ओसारेति – दोसारितो. तित्थियपक्कन्तको, भिक्खवे…पे… तिरच्छानगतो, भिक्खवे… मातुघातको, भिक्खवे… पितुघातको, भिक्खवे… अरहन्तघातको, भिक्खवे… भिक्खुनिदूसको, भिक्खवे… सङ्घभेदको, भिक्खवे… लोहितुप्पादको, भिक्खवे… उभतोब्यञ्जनको, भिक्खवे, अप्पत्तो, ओसारणं, तञ्चे सङ्घो ओसारेति – दोसारितो. अयं वुच्चति, भिक्खवे, पुग्गलो अप्पत्तो ओसारणं, तञ्चे सङ्घो ओसारेति – दोसारितो. इमे वुच्चन्ति, भिक्खवे, पुग्गला अप्पत्ता ओसारणं, ते चे सङ्घो ओसारेति – दोसारिता.

कतमो च, भिक्खवे, पुग्गलो अप्पत्तो ओसारणं, तञ्चे सङ्घो ओसारेति – सोसारितो? हत्थच्छिन्नो, भिक्खवे, अप्पत्तो ओसारणं, तञ्चे सङ्घो ओसारेति, सोसारितो. पादच्छिन्नो, भिक्खवे…पे… हत्थपादच्छिन्नो, भिक्खवे… कण्णच्छिन्नो, भिक्खवे… नासच्छिन्नो, भिक्खवे… कण्णनासच्छिन्नो, भिक्खवे… अङ्गुलिच्छिन्नो, भिक्खवे… अळच्छिन्नो, भिक्खवे… कण्डरच्छिन्नो, भिक्खवे… फणहत्थको, भिक्खवे… खुज्जो, भिक्खवे… वामनो, भिक्खवे… गलगण्डी, भिक्खवे… लक्खणाहतो, भिक्खवे… कसाहतो, भिक्खवे… लिखितको, भिक्खवे… सीपदिको, भिक्खवे… पापरोगी, भिक्खवे… परिसदूसको, भिक्खवे… काणो, भिक्खवे… कुणी, भिक्खवे… खञ्जो, भिक्खवे… पक्खहतो, भिक्खवे… छिन्निरियापथो, भिक्खवे… जरादुब्बलो, भिक्खवे… अन्धो, भिक्खवे… मूगो, भिक्खवे… बधिरो, भिक्खवे… अन्धमूगो, भिक्खवे… अन्धबधिरो, भिक्खवे… मूगबधिरो, भिक्खवे… अन्धमूगबधिरो, भिक्खवे, अप्पत्तो ओसारणं, तञ्चे सङ्घो ओसारेति – सोसारितो. अयं वुच्चति, भिक्खवे, पुग्गलो अप्पत्तो ओसारणं, तञ्चे सङ्घो ओसारेति – सोसारितो. इमे वुच्चन्ति, भिक्खवे, पुग्गला अप्पत्ता ओसारणं, ते चे सङ्घो ओसारेति – सोसारिता.

द्वेनिस्सारणादिकथा निट्ठिता.

वासभगामभाणवारो निट्ठितो पठमो.