२३२. अट्ठचीवरमातिका

३७९. अट्ठिमा, भिक्खवे, मातिका चीवरस्स उप्पादाय – सीमाय देति, कतिकाय देति, भिक्खापञ्ञत्तिया देति, सङ्घस्स देति, उभतोसङ्घस्स देति, वस्संवुट्ठसङ्घस्स देति, आदिस्स देति, पुग्गलस्स देति.

सीमाय देति – यावतिका भिक्खू अन्तोसीमगता तेहि भाजेतब्बं. कतिकाय देति – सम्बहुला आवासा समानलाभा होन्ति एकस्मिं आवासे दिन्ने सब्बत्थ दिन्नं होति. भिक्खापञ्ञत्तिया देति, यत्थ सङ्घस्स धुवकारा करिय्यन्ति, तत्थ देति. सङ्घस्स देति, सम्मुखीभूतेन सङ्घेन भाजेतब्बं. उभतोसङ्घस्स देति, बहुकापि भिक्खू होन्ति, एका भिक्खुनी होति, उपड्ढं दातब्बं, बहुकापि भिक्खुनियो होन्ति, एको भिक्खु होति, उपड्ढं दातब्बं. वस्संवुट्ठसङ्घस्स देति, यावतिका भिक्खू तस्मिं आवासे वस्संवुट्ठा, तेहि भाजेतब्बं. आदिस्स देति, यागुया वा भत्ते वा खादनीये वा चीवरे वा सेनासने वा भेसज्जे वा. पुग्गलस्स देति, ‘‘इमं चीवरं इत्थन्नामस्स दम्मी’’ति.

अट्ठचीवरमातिका निट्ठिता.

चीवरक्खन्धको अट्ठमो.