२३१. दुग्गहितसुग्गहितादिकथा

३७७. तेन खो पन समयेन आयस्मा रेवतो अञ्ञतरस्स भिक्खुनो हत्थे आयस्मतो सारिपुत्तस्स चीवरं पाहेसि – ‘‘इमं चीवरं थेरस्स देही’’ति. अथ खो सो भिक्खु अन्तरामग्गे आयस्मतो रेवतस्स विस्सासा तं चीवरं अग्गहेसि. अथ खो आयस्मा रेवतो आयस्मता सारिपुत्तेन समागन्त्वा पुच्छि – ‘‘अहं, भन्ते, थेरस्स चीवरं पाहेसिं. सम्पत्तं तं चीवर’’न्ति? ‘‘नाहं तं, आवुसो, चीवरं पस्सामी’’ति. अथ खो आयस्मा रेवतो तं भिक्खुं एतदवोच – ‘‘अहं, आवुसो, आयस्मतो हत्थे थेरस्स चीवरं पाहेसिं. कहं तं चीवर’’न्ति? ‘‘अहं, भन्ते, आयस्मतो विस्सासा तं चीवरं अग्गहेसि’’न्ति. भगवतो एतमत्थं आरोचेसुं.

३७८. इध पन, भिक्खवे, भिक्खु भिक्खुस्स हत्थे चीवरं पहिणति – ‘‘इमं चीवरं इत्थन्नामस्स देही’’ति. सो अन्तरामग्गे यो पहिणति तस्स विस्सासा गण्हाति. सुग्गहितं. यस्स पहिय्यति तस्स विस्सासा गण्हाति. दुग्गहितं.

इध पन, भिक्खवे, भिक्खु भिक्खुस्स हत्थे चीवरं पहिणति – ‘‘इमं चीवरं इत्थन्नामस्स देही’’ति. सो अन्तरामग्गे यस्स पहिय्यति तस्स विस्सासा गण्हाति. दुग्गहितं. यो पहिणति तस्स विस्सासा गण्हाति. सुग्गहितं.

इध पन, भिक्खवे, भिक्खु भिक्खुस्स हत्थे चीवरं पहिणति – ‘‘इमं चीवरं इत्थन्नामस्स देही’’ति. सो अन्तरामग्गे सुणाति – यो पहिणति सो कालङ्कतोति. तस्स मतकचीवरं अधिट्ठाति. स्वाधिट्ठितं. यस्स पहिय्यति तस्स विस्सासा गण्हाति. दुग्गहितं.

इध पन, भिक्खवे, भिक्खु भिक्खुस्स हत्थे चीवरं पहिणति – ‘‘इमं चीवरं इत्थन्नामस्स देही’’ति. सो अन्तरामग्गे सुणाति – यस्स पहिय्यति सो कालङ्कतोति. तस्स मतकचीवरं अधिट्ठाति. द्वाधिट्ठितं. यो पहिणति तस्स विस्सासा गण्हाति. सुग्गहितं.

इध पन, भिक्खवे, भिक्खु भिक्खुस्स हत्थे चीवरं पहिणति – ‘‘इमं चीवरं इत्थन्नामस्स देही’’ति. सो अन्तरामग्गे सुणाति – उभो कालङ्कताति. यो पहिणति तस्स मतकचीवरं अधिट्ठाति. स्वाधिट्ठितं. यस्स पहिय्यति तस्स मतकचीवरं अधिट्ठाति. द्वाधिट्ठितं.

इध पन, भिक्खवे, भिक्खु भिक्खुस्स हत्थे चीवरं पहिणति – ‘‘इमं चीवरं इत्थन्नामस्स दम्मी’’ति. सो अन्तरामग्गे यो पहिणति तस्स विस्सासा गण्हाति. दुग्गहितं. यस्स पहिय्यति तस्स विस्सासा गण्हाति. सुग्गहितं.

इध पन, भिक्खवे, भिक्खु भिक्खुस्स हत्थे चीवरं पहिणति – ‘‘इमं चीवरं इत्थन्नामस्स दम्मी’’ति. सो अन्तरामग्गे यस्स पहिय्यति तस्स विस्सासा गण्हाति. सुग्गहितं. यो पहिणति तस्स विस्सासा गण्हाति. दुग्गहितं.

इध पन, भिक्खवे, भिक्खु भिक्खुस्स हत्थे चीवरं पहिणति – ‘‘इमं चीवरं इत्थन्नामस्स दम्मी’’ति. सो अन्तरामग्गे सुणाति – ‘‘यो पहिणति सो कालङ्कतो’’ति. तस्स मतकचीवरं अधिट्ठाति. द्वाधिट्ठितं. यस्स पहिय्यति तस्स विस्सासा गण्हाति. सुग्गहितं.

इध पन, भिक्खवे, भिक्खु भिक्खुस्स हत्थे चीवरं पहिणति – ‘‘इमं चीवरं इत्थन्नामस्स दम्मी’’ति. सो अन्तरामग्गे सुणाति – ‘‘यस्स पहिय्यति सो कालङ्कतो’’ति. तस्स मतकचीवरं अधिट्ठाति. स्वाधिट्ठितं. यो पहिणति तस्स विस्सासा गण्हाति. दुग्गहितं.

इध पन, भिक्खवे, भिक्खु भिक्खुस्स हत्थे चीवरं पहिणति – ‘‘इमं चीवरं इत्थन्नामस्स दम्मी’’ति. सो अन्तरामग्गे सुणाति ‘‘उभो कालङ्कता’’ति. यो पहिणति तस्स मतकचीवरं अधिट्ठाति. द्वाधिट्ठितं. यस्स पहिय्यति तस्स मतकचीवरं अधिट्ठाति. स्वाधिट्ठितं.

दुग्गहितसुग्गहितादिकथा निट्ठिता.