२३०. सङ्घे भिन्ने चीवरुप्पादकथा

३७६. इध पन, भिक्खवे, वस्संवुट्ठानं भिक्खूनं अनुप्पन्ने चीवरे सङ्घो भिज्जति. तत्थ मनुस्सा एकस्मिं पक्खे उदकं देन्ति, एकस्मिं पक्खे चीवरं देन्ति – सङ्घस्स देमाति. सङ्घस्सेवेतं.

इध पन, भिक्खवे, वस्संवुट्ठानं भिक्खूनं अनुप्पन्ने चीवरे सङ्घो भिज्जति. तत्थ मनुस्सा एकस्मिं पक्खे उदकं देन्ति, तस्मिंयेव पक्खे चीवरं देन्ति – सङ्घस्स देमाति. सङ्घस्सेवेतं.

इध पन, भिक्खवे, वस्संवुट्ठानं भिक्खूनं अनुप्पन्ने चीवरे सङ्घो भिज्जति. तत्थ मनुस्सा एकस्मिं पक्खे उदकं देन्ति, एकस्मिं पक्खे चीवरं देन्ति – पक्खस्स देमाति. पक्खस्सेवेतं.

इध पन, भिक्खवे, वस्संवुट्ठानं भिक्खूनं अनुप्पन्ने चीवरे सङ्घो भिज्जति. तत्थ मनुस्सा एकस्मिं पक्खे उदकं देन्ति, तस्मिंयेव पक्खे चीवरं देन्ति – पक्खस्स देमाति. पक्खस्सेवेतं.

इध पन, भिक्खवे, वस्संवुट्ठानं भिक्खूनं उप्पन्ने चीवरे अभाजिते सङ्घो भिज्जति. सब्बेसं समकं भाजेतब्बन्ति.

सङ्घे भिन्ने चीवरुप्पादकथा निट्ठिता.