२०६. सेट्ठिपुत्तवत्थु

३३३. तेन खो पन समयेन बाराणसेय्यकस्स सेट्ठिपुत्तस्स मोक्खचिकाय कीळन्तस्स अन्तगण्ठाबाधो होति, येन यागुपि पीता न सम्मा परिणामं गच्छति, भत्तम्पि भुत्तं न सम्मा परिणामं गच्छति, उच्चारोपि पस्सावोपि न पगुणो. सो तेन किसो होति लूखो दुब्बण्णो उप्पण्डुप्पण्डुकजातो धमनिसन्थतगत्तो. अथ खो बाराणसेय्यकस्स सेट्ठिस्स एतदहोसि – ‘‘मय्हं खो पुत्तस्स तादिसो आबाधो, येन यागुपि पीता न सम्मा परिणामं गच्छति, भत्तम्पि भुत्तं न सम्मा परिणामं गच्छति, उच्चारोपि पस्सावोपि न पगुणो. सो तेन किसो लूखो दुब्बण्णो उप्पण्डुप्पण्डुकजातो धमनिसन्थतगत्तो. यंनूनाहं राजगहं गन्त्वा राजानं जीवकं वेज्जं याचेय्यं पुत्तं मे तिकिच्छितु’’न्ति. अथ खो बाराणसेय्यको सेट्ठि राजगहं गन्त्वा येन राजा मागधो सेनियो बिम्बिसारो तेनुपसङ्कमि, उपसङ्कमित्वा राजानं मागधं सेनियं बिम्बिसारं एतदवोच – ‘‘मय्हं खो, देव, पुत्तस्स तादिसो आबाधो, येन यागुपि पीता न सम्मा परिणामं गच्छति, भत्तम्पि भुत्तं न सम्मा परिणामं गच्छति, उच्चारोपि पस्सावोपि न पगुणो. सो तेन किसो लूखो दुब्बण्णो उप्पण्डुप्पण्डुकजातो धमनिसन्थतगत्तो. साधु देवो जीवकं वेज्जं आणापेतु पुत्तं मे तिकिच्छितु’’न्ति.

अथ खो राजा मागधो सेनियो बिम्बिसारो जीवकं कोमारभच्चं आणापेसि – ‘‘गच्छ, भणे जीवक, बाराणसिं गन्त्वा बाराणसेय्यकं सेट्ठिपुत्तं तिकिच्छाही’’ति. ‘‘एवं, देवा’’ति खो जीवको कोमारभच्चो रञ्ञो मागधस्स सेनियस्स बिम्बिसारस्स पटिस्सुत्वा बाराणसिं गन्त्वा येन बाराणसेय्यको सेट्ठिपुत्तो तेनुपसङ्कमि, उपसङ्कमित्वा बाराणसेय्यकस्स सेट्ठिपुत्तस्स विकारं सल्लक्खेत्वा जनं उस्सारेत्वा तिरोकरणियं परिक्खिपित्वा थम्भे उब्बन्धित्वा [उपनिबन्धित्वा (सी. स्या.)] भरियं पुरतो ठपेत्वा उदरच्छविं उप्पाटेत्वा अन्तगण्ठिं नीहरित्वा भरियाय दस्सेसि – ‘‘पस्स ते सामिकस्स आबाधं, इमिना यागुपि पीता न सम्मा परिणामं गच्छति, भत्तम्पि भुत्तं न सम्मा परिणामं गच्छति, उच्चारोपि पस्सावोपि न पगुणो; इमिनायं किसो लूखो दुब्बण्णो उप्पण्डुप्पण्डुकजातो धमनिसन्थतगत्तो’’ति. अन्तगण्ठिं विनिवेठेत्वा अन्तानि पटिपवेसेत्वा उदरच्छविं सिब्बित्वा आलेपं अदासि. अथ खो बाराणसेय्यको सेट्ठिपुत्तो नचिरस्सेव अरोगो अहोसि. अथ खो बाराणसेय्यको सेट्ठि ‘पुत्तो मे अरोगो ठितो’ति [अरोगापितोति (सी.)] जीवकस्स कोमारभच्चस्स सोळससहस्सानि पादासि. अथ खो जीवको कोमारभच्चो तानि सोळससहस्सानि आदाय पुनदेव राजगहं पच्चागञ्छि.

सेट्ठिपुत्तवत्थु निट्ठितं.