२००. पलिबोधापलिबोधकथा

३२५. द्वेमे, भिक्खवे, कथिनस्स पलिबोधा, द्वे अपलिबोधा. कतमे च, भिक्खवे, द्वे कथिनस्स पलिबोधा? आवासपलिबोधो च चीवरपलिबोधो च. कथञ्च, भिक्खवे, आवासपलिबोधो होति? इध, भिक्खवे, भिक्खु वसति वा तस्मिं आवासे, सापेक्खो वा पक्कमति ‘‘पच्चेस्स’’न्ति. एवं खो, भिक्खवे, आवासपलिबोधो होति. कथञ्च, भिक्खवे, चीवरपलिबोधो होति? इध, भिक्खवे, भिक्खुनो चीवरं अकतं वा होति विप्पकतं वा, चीवरासा वा अनुपच्छिन्ना. एवं खो, भिक्खवे, चीवरपलिबोधो होति. इमे खो, भिक्खवे, द्वे कथिनस्स पलिबोधा.

कतमे च, भिक्खवे, द्वे कथिनस्स अपलिबोधा? आवासअपलिबोधो च चीवरअपलिबोधो च. कथञ्च, भिक्खवे, आवासअपलिबोधो होति? इध, भिक्खवे, भिक्खु पक्कमति तम्हा आवासा चत्तेन वन्तेन मुत्तेन अनपेक्खो [अनपेक्खेन (क.)] ‘‘न पच्चेस्स’’न्ति. एवं खो, भिक्खवे, आवासअपलिबोधो होति. कथञ्च, भिक्खवे, चीवरअपलिबोधो होति? इध, भिक्खवे, भिक्खुनो चीवरं कतं वा होति, नट्ठं वा विनट्ठं वा दड्ढं वा, चीवरासा वा उपच्छिन्ना. एवं खो, भिक्खवे, चीवरअपलिबोधो होति. इमे खो, भिक्खवे, द्वे कथिनस्स अपलिबोधाति.

पलिबोधापलिबोधकथा निट्ठिता.

कथिनक्खन्धको निट्ठितो सत्तमो.