२०१. तस्सुद्दानं

तिंस पावेय्यका भिक्खू, साकेतुक्कण्ठिता वसुं;

वस्संवुट्ठोकपुण्णेहि, अगमुं जिनदस्सनं.

इदं वत्थु कथिनस्स, कप्पिस्सन्ति च पञ्चका;

अनामन्ता असमाचारा, तथेव गणभोजनं.

यावदत्थञ्च उप्पादो, अत्थतानं भविस्सति;

ञत्ति एवत्थतञ्चेव, एवञ्चेव अनत्थतं.

उल्लिखि धोवना चेव, विचारणञ्च छेदनं;

बन्धनो वट्टि कण्डुस, दळ्हीकम्मानुवातिका.

परिभण्डं ओवद्धेय्यं, मद्दना निमित्तं कथा;

कुक्कु सन्निधि निस्सग्गि, न कप्पञ्ञत्र ते तयो.

अञ्ञत्र पञ्चातिरेके, सञ्छिन्नेन समण्डली;

नाञ्ञत्र पुग्गला सम्मा, निस्सीमट्ठोनुमोदति.

कथिनानत्थतं होति, एवं बुद्धेन देसितं;

अहताकप्पपिलोति, पंसु पापणिकाय च.

अनिमित्तापरिकथा, अकुक्कु च असन्निधि;

अनिस्सग्गि कप्पकते, तथा तिचीवरेन च.

पञ्चके वातिरेके वा, छिन्ने समण्डलीकते;

पुग्गलस्सत्थारा सम्मा, सीमट्ठो अनुमोदति.

एवं कथिनत्थरणं, उब्भारस्सट्ठमातिका;

पक्कमनन्ति निट्ठानं, सन्निट्ठानञ्च नासनं.

सवनं आसावच्छेदि, सीमा सहुब्भारट्ठमी;

कतचीवरमादाय, ‘‘न पच्चेस्स’’न्ति गच्छति.

तस्स तं कथिनुद्धारा,ए होति पक्कमनन्तिको;

आदाय चीवरं याति, निस्सीमे इदं चिन्तयि.

‘‘कारेस्सं न पच्चेस्स’’न्ति, निट्ठाने कथिनुद्धारो;

आदाय निस्सीमं नेव, ‘‘न पच्चेस्स’’न्ति मानसो.

तस्स तं कथिनुद्धारो, सन्निट्ठानन्तिको भवे;

आदाय चीवरं याति, निस्सीमे इदं चिन्तयि.

‘‘कारेस्सं न पच्चेस्स’’न्ति, कयिरं तस्स नस्सति;

तस्स तं कथिनुद्धारो, भवति नासनन्तिको.

आदाय याति ‘‘पच्चेस्सं’’, बहि कारेति चीवरं;

कतचीवरो सुणाति, उब्भतं कथिनं तहिं.

तस्स तं कथिनुद्धारो, भवति सवनन्तिको;

आदाय याति ‘‘पच्चेस्सं’’, बहि कारेति चीवरं.

कतचीवरो बहिद्धा, नामेति कथिनुद्धारं;

तस्स तं कथिनुद्धारो, सीमातिक्कन्तिको भवे.

आदाय याति ‘‘पच्चेस्सं’’, बहि कारेति चीवरं;

कतचीवरो पच्चेस्सं, सम्भोति कथिनुद्धारं.

तस्स तं कथिनुद्धारो, सह भिक्खूहि जायति;

आदाय च समादाय, सत्त-सत्तविधा गति.

पक्कमनन्तिका नत्थि, छक्के विप्पकते [छट्ठे विप्पकता (सी.), छच्चा विप्पकथा (क.)] गति;

आदाय निस्सीमगतं, कारेस्सं इति जायति.

निट्ठानं सन्निट्ठानञ्च, नासनञ्च इमे तयो;

आदाय ‘‘न पच्चेस्स’’न्ति, बहिसीमे करोमिति.

निट्ठानं सन्निट्ठानम्पि, नासनम्पि इदं तयो;

अनधिट्ठितेन नेवस्स, हेट्ठा तीणि नयाविधि.

आदाय याति पच्चेस्सं, बहिसीमे करोमिति;

‘‘न पच्चेस्स’’न्ति कारेति, निट्ठाने कथिनुद्धारो.

सन्निट्ठानं नासनञ्च, सवनसीमातिक्कमा;

सह भिक्खूहि जायेथ, एवं पन्नरसं गति.

समादाय विप्पकता, समादाय पुना तथा;

इमे ते चतुरो वारा, सब्बे पन्नरसविधि.

अनासाय च आसाय, करणीयो च ते तयो;

नयतो तं विजानेय्य, तयो द्वादस द्वादस.

अपविलाना नवेत्थ [अपविलायमानेव (स्या.), अपविना नव चेत्थ (सी.)], फासु पञ्चविधा तहिं;

पलिबोधापलिबोधा, उद्दानं नयतो कतन्ति.

इमम्हि खन्धके वत्थू दोळसकपेय्यालमुखानि एकसतं अट्ठारस.

कथिनक्खन्धको निट्ठितो.