१९७. करणीयदोळसकं

३२०. भिक्खु अत्थतकथिनो केनचिदेव करणीयेन पक्कमति. तस्स बहिसीमगतस्स चीवरासा उप्पज्जति. सो तं चीवरासं पयिरुपासति. अनासाय लभति, आसाय न लभति. तस्स एवं होति – ‘‘इधेविमं चीवरं कारेस्सं, न पच्चेस्स’’न्ति. सो तं चीवरं कारेति. तस्स भिक्खुनो निट्ठानन्तिको कथिनुद्धारो.

भिक्खु अत्थतकथिनो केनचिदेव करणीयेन पक्कमति. तस्स बहिसीमगतस्स चीवरासा उप्पज्जति. सो तं चीवरासं पयिरुपासति. अनासाय लभति, आसाय न लभति. तस्स एवं होति – ‘‘नेविमं चीवरं कारेस्सं, न पच्चेस्स’’न्ति. तस्स भिक्खुनो सन्निट्ठानन्तिको कथिनुद्धारो.

भिक्खु अत्थतकथिनो केनचिदेव करणीयेन पक्कमति. तस्स बहिसीमगतस्स चीवरासा उप्पज्जति. सो तं चीवरासं पयिरुपासति. अनासाय लभति, आसाय न लभति. तस्स एवं होति – ‘‘इधेविमं चीवरं कारेस्सं, न पच्चेस्स’’न्ति. सो तं चीवरं कारेति. तस्स तं चीवरं कयिरमानं नस्सति. तस्स भिक्खुनो नासनन्तिको कथिनुद्धारो.

भिक्खु अत्थतकथिनो केनचिदेव करणीयेन पक्कमति. तस्स बहिसीमगतस्स चीवरासा उप्पज्जति. तस्स एवं होति – ‘‘इधेविमं चीवरासं पयिरुपासिस्सं, न पच्चेस्स’’न्ति. सो तं चीवरासं पयिरुपासति. तस्स सा चीवरासा उपच्छिज्जति. तस्स भिक्खुनो आसावच्छेदिको कथिनुद्धारो.

भिक्खु अत्थतकथिनो केनचिदेव करणीयेन पक्कमति ‘‘न पच्चेस्स’’न्ति. तस्स बहिसीमगतस्स चीवरासा उप्पज्जति. सो तं चीवरासं पयिरुपासति. अनासाय लभति, आसाय न लभति. तस्स एवं होति – ‘‘इधेविमं चीवरं कारेस्स’’न्ति. सो तं चीवरं कारेति. तस्स भिक्खुनो निट्ठानन्तिको कथिनुद्धारो.

भिक्खु अत्थतकथिनो केनचिदेव करणीयेन पक्कमति ‘‘न पच्चेस्स’’न्ति. तस्स बहिसीमगतस्स चीवरासा उप्पज्जति. सो तं चीवरासं पयिरुपासति. अनासाय लभति, आसाय न लभति. तस्स एवं होति – ‘‘नेविमं चीवरं कारेस्स’’न्ति. तस्स भिक्खुनो सन्निट्ठानन्तिको कथिनुद्धारो.

भिक्खु अत्थतकथिनो केनचिदेव करणीयेन पक्कमति ‘‘न पच्चेस्स’’न्ति. तस्स बहिसीमगतस्स चीवरासा उप्पज्जति. सो तं चीवरासं पयिरुपासति. अनासाय लभति, आसाय न लभति. तस्स एवं होति – ‘‘इधेविमं चीवरं कारेस्स’’न्ति. सो तं चीवरं कारेति. तस्स तं चीवरं कयिरमानं नस्सति. तस्स भिक्खुनो नासनन्तिको कथिनुद्धारो.

भिक्खु अत्थतकथिनो केनचिदेव करणीयेन पक्कमति ‘‘न पच्चेस्स’’न्ति. तस्स बहिसीमगतस्स चीवरासा उप्पज्जति. तस्स एवं होति – ‘‘इधेविमं चीवरासं पयिरुपासिस्स’’न्ति. सो तं चीवरासं पयिरुपासति. तस्स सा चीवरासा उपच्छिज्जति. तस्स भिक्खुनो आसावच्छेदिको कथिनुद्धारो.

भिक्खु अत्थतकथिनो केनचिदेव करणीयेन पक्कमति अनधिट्ठितेन; नेवस्स होति – ‘‘पच्चेस्स’’न्ति, न पनस्स होति – ‘‘न पच्चेस्स’’न्ति. तस्स बहिसीमगतस्स चीवरासा उप्पज्जति. सो तं चीवरासं पयिरुपासति. अनासाय लभति, आसाय न लभति. तस्स एवं होति – ‘‘इधेविमं चीवरं कारेस्सं, न पच्चेस्स’’न्ति. सो तं चीवरं कारेति. तस्स भिक्खुनो निट्ठानन्तिको कथिनुद्धारो.

भिक्खु अत्थतकथिनो केनचिदेव करणीयेन पक्कमति अनधिट्ठितेन; नेवस्स होति – ‘‘पच्चेस्स’’न्ति, न पनस्स होति – ‘‘न पच्चेस्स’’न्ति. तस्स बहिसीमगतस्स चीवरासा उप्पज्जति. सो तं चीवरासं पयिरुपासति. अनासाय लभति, आसाय न लभति. तस्स एवं होति – ‘‘नेविमं चीवरं कारेस्सं, न पच्चेस्स’’न्ति. तस्स भिक्खुनो सन्निट्ठानन्तिको कथिनुद्धारो.

भिक्खु अत्थतकथिनो केनचिदेव करणीयेन पक्कमति अनधिट्ठितेन; नेवस्स होति – ‘‘पच्चेस्स’’न्ति, न पनस्स होति – ‘‘न पच्चेस्स’’न्ति. तस्स बहिसीमगतस्स चीवरासा उप्पज्जति. सो तं चीवरासं पयिरुपासति. अनासाय लभति, आसाय न लभति. तस्स एवं होति – ‘‘इधेविमं चीवरं कारेस्सं, न पच्चेस्स’’न्ति. सो तं चीवरं कारेति. तस्स तं चीवरं कयिरमानं नस्सति. तस्स भिक्खुनो नासनन्तिको कथिनुद्धारो.

भिक्खु अत्थतकथिनो केनचिदेव करणीयेन पक्कमति अनधिट्ठितेन; नेवस्स होति – ‘‘पच्चेस्स’’न्ति, न पनस्स होति – ‘‘न पच्चेस्स’’न्ति. तस्स बहिसीमगतस्स चीवरासा उप्पज्जति. तस्स एवं होति – ‘‘इधेविमं चीवरासं पयिरुपासिस्सं, न पच्चेस्स’’न्ति. सो तं चीवरासं पयिरुपासति. तस्स सा चीवरासा उपच्छिज्जति. तस्स भिक्खुनो आसावच्छेदिको कथिनुद्धारो.

करणीयदोळसकं निट्ठितं.