१९८. अपविलायननवकं

३२१. भिक्खु अत्थतकथिनो दिसंगमिको पक्कमति चीवरपटिवीसं अपविलायमानो [अपविनयमानो (सी.), अपचिनयमानो (क.)]. तमेनं दिसङ्गतं भिक्खू पुच्छन्ति – ‘‘कहं त्वं, आवुसो, वस्संवुट्ठो, कत्थ च ते चीवरपटिवीसो’’ति? सो एवं वदेति – ‘‘अमुकस्मिं आवासे वस्संवुट्ठोम्हि. तत्थ च मे चीवरपटिवीसो’’ति. ते एवं वदन्ति – ‘‘गच्छावुसो, तं चीवरं आहर, मयं ते इध चीवरं करिस्सामा’’ति. सो तं आवासं गन्त्वा भिक्खू पुच्छति – ‘‘कहं मे, आवुसो, चीवरपटिवीसो’’ति? ते एवं वदन्ति – ‘‘अयं ते, आवुसो, चीवरपटिवीसो; कहं गमिस्ससी’’ति? सो एवं वदेति – ‘‘अमुकं नाम [अमुकञ्च (क.)] आवासं गमिस्सामि, तत्थ मे भिक्खू चीवरं करिस्सन्ती’’ति. ते एवं वदन्ति – ‘‘अलं, आवुसो, मा अगमासि. मयं ते इध चीवरं करिस्सामा’’ति. तस्स एवं होति – ‘‘इधेविमं चीवरं कारेस्सं, न पच्चेस्स’’न्ति. सो तं चीवरं कारेति. तस्स भिक्खुनो निट्ठानन्तिको कथिनुद्धारो.

भिक्खु अत्थतकथिनो दिसंगमिको पक्कमति…पे… ‘‘नेविमं चीवरं कारेस्सं, न पच्चेस्स’’न्ति. तस्स भिक्खुनो सन्निट्ठानन्तिको कथिनुद्धारो.

भिक्खु अत्थतकथिनो दिसंगमिको पक्कमति…पे… ‘‘इधेविमं चीवरं कारेस्सं, न पच्चेस्स’’न्ति. सो तं चीवरं कारेति. तस्स तं चीवरं कयिरमानं नस्सति. तस्स भिक्खुनो नासनन्तिको कथिनुद्धारो.

३२२. भिक्खु अत्थतकथिनो दिसंगमिको पक्कमति चीवरपटिवीसं अपविलायमानो. तमेनं दिसंगतं भिक्खू पुच्छन्ति – ‘‘कहं त्वं, आवुसो, वस्संवुट्ठो, कत्थ च ते चीवरपटिवीसो’’ति? सो एवं वदेति – ‘‘अमुकस्मिं आवासे वस्संवुट्ठोम्हि, तत्थ च मे चीवरपटिवीसो’’ति. ते एवं वदन्ति – ‘‘गच्छावुसो, तं चीवरं आहर, मयं ते इध चीवरं करिस्सामा’’ति. सो तं आवासं गन्त्वा भिक्खू पुच्छति – ‘‘कहं मे, आवुसो, चीवरपटिवीसो’’ति? ते एवं वदन्ति – ‘‘अयं ते, आवुसो, चीवरपटिवीसो’’ति. सो तं चीवरं आदाय तं आवासं गच्छति. तमेनं अन्तरामग्गे भिक्खू पुच्छन्ति – ‘‘आवुसो, कहं गमिस्ससी’’ति? सो एवं वदेति – ‘‘अमुकं नाम आवासं गमिस्सामि, तत्थ मे भिक्खू चीवरं करिस्सन्ती’’ति. ते एवं वदन्ति – ‘‘अलं, आवुसो, मा अगमासि, मयं ते इध चीवरं करिस्सामा’’ति. तस्स एवं होति – ‘‘इधेविमं चीवरं कारेस्सं न पच्चेस्स’’न्ति. सो तं चीवरं कारेति. तस्स भिक्खुनो निट्ठानन्तिको कथिनुद्धारो.

भिक्खु अत्थतकथिनो दिसंगमिको पक्कमति चीवरपटिवीसं अपविलायमानो. तमेनं दिसंगतं भिक्खू पुच्छन्ति – ‘‘कहं त्वं, आवुसो, वस्संवुट्ठो, कत्थ च ते चीवरपटिवीसो’’ति? सो एवं वदेति – ‘‘अमुकस्मिं आवासे वस्संवुट्ठोम्हि, तत्थ च मे चीवरपटिवीसो’’ति. ते एवं वदन्ति – ‘‘गच्छावुसो, तं चीवरं आहर, मयं ते इध चीवरं करिस्सामा’’ति. सो तं आवासं गन्त्वा भिक्खू पुच्छति – ‘‘कहं मे, आवुसो, चीवरपटिवीसो’’ति? ते एवं वदन्ति – ‘‘अयं ते, आवुसो, चीवरपटिवीसो’’ति. सो तं चीवरं आदाय तं आवासं गच्छति. तमेनं अन्तरामग्गे भिक्खू पुच्छन्ति – ‘‘आवुसो, कहं गमिस्ससी’’ति? सो एवं वदेति – ‘‘अमुकं नाम आवासं गमिस्सामि, तत्थ मे भिक्खू चीवरं करिस्सन्ती’’ति. ते एवं वदन्ति – ‘‘अलं, आवुसो, मा अगमासि, मयं ते इध चीवरं करिस्सामा’’ति. तस्स एवं होति – ‘‘नेविमं चीवरं कारेस्सं, न पच्चेस्स’’न्ति. तस्स भिक्खुनो सन्निट्ठानन्तिको कथिनुद्धारो.

३२३. भिक्खु अत्थतकथिनो दिसंगमिको पक्कमति चीवरपटिवीसं अपविलायमानो. तमेनं दिसंगतं भिक्खू पुच्छन्ति – ‘‘कहं त्वं, आवुसो, वस्संवुट्ठो, कत्थ च ते चीवरपटिवीसो’’ति? सो एवं वदेति – ‘‘अमुकस्मिं आवासे वस्संवुट्ठोम्हि, तत्थ च मे चीवरपटिवीसो’’ति. ते एवं वदन्ति – ‘‘गच्छावुसो, तं चीवरं आहर, मयं ते इध चीवरं करिस्सामा’’ति. सो तं आवासं गन्त्वा भिक्खू पुच्छति – ‘‘कहं मे, आवुसो, चीवरपटिवीसो’’ति? ते एवं वदन्ति – ‘‘अयं ते, आवुसो, चीवरपटिवीसो’’ति. सो तं चीवरं आदाय तं आवासं गच्छति. तस्स तं आवासं गतस्स एवं होति – ‘‘इधेविमं चीवरं कारेस्सं, न पच्चेस्स’’न्ति. सो तं चीवरं कारेति. तस्स भिक्खुनो निट्ठानन्तिको कथिनुद्धारो.

अपविलायननवकं निट्ठितं.