१९६. आसादोळसकं

३१९. भिक्खु अत्थतकथिनो चीवरासाय पक्कमति ‘‘पच्चेस्स’’न्ति. सो बहिसीमगतो तं चीवरासं पयिरुपासति. आसाय लभति, अनासाय न लभति. तस्स एवं होति – ‘‘इधेविमं चीवरं कारेस्सं, न पच्चेस्स’’न्ति. सो तं चीवरं कारेति. तस्स भिक्खुनो निट्ठानन्तिको कथिनुद्धारो.

भिक्खु अत्थतकथिनो चीवरासाय पक्कमति ‘‘पच्चेस्स’’न्ति. सो बहिसीमगतो तं चीवरासं पयिरुपासति. आसाय लभति, अनासाय न लभति. तस्स एवं होति – ‘‘नेविमं चीवरं कारेस्सं, न पच्चेस्स’’न्ति. तस्स भिक्खुनो सन्निट्ठानन्तिको कथिनुद्धारो.

भिक्खु अत्थतकथिनो चीवरासाय पक्कमति ‘‘पच्चेस्स’’न्ति. सो बहिसीमगतो तं चीवरासं पयिरुपासति. आसाय लभति, अनासाय न लभति. तस्स एवं होति – ‘‘इधेविमं चीवरं कारेस्सं, न पच्चेस्स’’न्ति. सो तं चीवरं कारेति. तस्स तं चीवरं कयिरमानं नस्सति. तस्स भिक्खुनो नासनन्तिको कथिनुद्धारो.

भिक्खु अत्थतकथिनो चीवरासाय पक्कमति ‘‘पच्चेस्स’’न्ति. तस्स बहिसीमगतस्स एवं होति – ‘‘इधेविमं चीवरासं पयिरुपासिस्सं, न पच्चेस्स’’न्ति. सो तं चीवरासं पयिरुपासति. तस्स सा चीवरासा उपच्छिज्जति. तस्स भिक्खुनो आसावच्छेदिको कथिनुद्धारो.

भिक्खु अत्थतकथिनो चीवरासाय पक्कमति ‘‘पच्चेस्स’’न्ति. सो बहिसीमगतो सुणाति – ‘‘उब्भतं किर तस्मिं आवासे कथिन’’न्ति. तस्स एवं होति – ‘‘यतो तस्मिं आवासे उब्भतं कथिनं, इधेविमं चीवरासं पयिरुपासिस्स’’न्ति. सो तं चीवरासं पयिरुपासति. आसाय लभति, अनासाय न लभति. तस्स एवं होति – ‘‘इधेविमं चीवरं कारेस्सं, न पच्चेस्स’’न्ति. सो तं चीवरं कारेति. तस्स भिक्खुनो निट्ठानन्तिको कथिनुद्धारो.

भिक्खु अत्थतकथिनो चीवरासाय पक्कमति ‘‘पच्चेस्स’’न्ति. सो बहिसीमगतो सुणाति – ‘‘उब्भतं किर तस्मिं आवासे कथिन’’न्ति. तस्स एवं होति – ‘‘यतो तस्मिं आवासे उब्भतं कथिनं, इधेविमं चीवरासं पयिरुपासिस्स’’न्ति. सो तं चीवरासं पयिरुपासति. आसाय लभति, अनासाय न लभति. तस्स एवं होति – ‘‘नेविमं चीवरं कारेस्सं, न पच्चेस्स’’न्ति. तस्स भिक्खुनो सन्निट्ठानन्तिको कथिनुद्धारो.

भिक्खु अत्थतकथिनो चीवरासाय पक्कमति ‘‘पच्चेस्स’’न्ति. सो बहिसीमगतो सुणाति – ‘‘उब्भतं किर तस्मिं आवासे कथिन’’न्ति. तस्स एवं होति – ‘‘यतो तस्मिं आवासे उब्भतं कथिनं, इधेविमं चीवरासं पयिरुपासिस्स’’न्ति. सो तं चीवरासं पयिरुपासति. आसाय लभति, अनासाय न लभति. तस्स एवं होति – ‘‘इधेविमं चीवरं कारेस्सं, न पच्चेस्स’’न्ति. सो तं चीवरं कारेति. तस्स तं चीवरं कयिरमानं नस्सति. तस्स भिक्खुनो नासनन्तिको कथिनुद्धारो.

भिक्खु अत्थतकथिनो चीवरासाय पक्कमति ‘‘पच्चेस्स’’न्ति. सो बहिसीमगतो सुणाति – ‘‘उब्भतं किर तस्मिं आवासे कथिन’’न्ति. तस्स एवं होति – ‘‘यतो तस्मिं आवासे उब्भतं कथिनं, इधेविमं चीवरासं पयिरुपासिस्सं, न पच्चेस्स’’न्ति. सो तं चीवरासं पयिरुपासति. तस्स सा चीवरासा उपच्छिज्जति. तस्स भिक्खुनो आसावच्छेदिको कथिनुद्धारो.

भिक्खु अत्थतकथिनो चीवरासाय पक्कमति ‘‘पच्चेस्स’’न्ति. सो बहिसीमगतो तं चीवरासं पयिरुपासति. आसाय लभति, अनासाय न लभति. सो तं चीवरं कारेति. सो कतचीवरो सुणाति – ‘‘उब्भतं किर तस्मिं आवासे कथिन’’न्ति. तस्स भिक्खुनो सवनन्तिको कथिनुद्धारो.

भिक्खु अत्थतकथिनो चीवरासाय पक्कमति ‘‘पच्चेस्स’’न्ति. सो बहिसीमगतो तं चीवरासं पयिरुपासति. आसाय लभति, अनासाय न लभति. सो तं चीवरं कारेति. सो कतचीवरो ‘‘पच्चेस्सं पच्चेस्स’’न्ति – बहिद्धा कथिनुद्धारं वीतिनामेति. तस्स भिक्खुनो सीमातिक्कन्तिको कथिनुद्धारो.

भिक्खु अत्थतकथिनो चीवरासाय पक्कमति ‘‘पच्चेस्स’’न्ति. सो बहिसीमगतो तं चीवरासं पयिरुपासति. आसाय लभति, अनासाय न लभति. सो तं चीवरं कारेति. सो कतचीवरो ‘‘पच्चेस्सं पच्चेस्स’’न्ति – सम्भुणाति कथिनुद्धारं. तस्स भिक्खुनो सह भिक्खूहि कथिनुद्धारो.

आसादोळसकं निट्ठितं.