१४३. वत्थुठपनादि

२३९. इध पन, भिक्खवे, भिक्खु तदहु पवारणाय सङ्घमज्झे उदाहरेय्य – ‘‘सुणातु मे, भन्ते, सङ्घो. इदं वत्थु पञ्ञायति, न पुग्गलो. यदि सङ्घस्स पत्तकल्लं, वत्थुं ठपेत्वा सङ्घो पवारेय्या’’ति. सो एवमस्स वचनीयो – ‘‘भगवता खो, आवुसो, विसुद्धानं पवारणा पञ्ञत्ता. सचे वत्थु पञ्ञायति, न पुग्गलो, इदानेव नं वदेही’’ति.

इध पन, भिक्खवे, भिक्खु तदहु पवारणाय सङ्घमज्झे उदाहरेय्य – ‘‘सुणातु मे, भन्ते, सङ्घो. अयं पुग्गलो पञ्ञायति, न वत्थु. यदि सङ्घस्स पत्तकल्लं, पुग्गलं ठपेत्वा सङ्घो पवारेय्या’’ति. सो एवमस्स वचनीयो – ‘‘भगवता खो, आवुसो, समग्गानं पवारणा पञ्ञत्ता. सचे पुग्गलो पञ्ञायति, न वत्थु, इदानेव नं वदेही’’ति.

इध पन, भिक्खवे, भिक्खु तदहु पवारणाय सङ्घमज्झे उदाहरेय्य – ‘‘सुणातु मे, भन्ते, सङ्घो. इदं वत्थु च पुग्गलो च पञ्ञायति. यदि सङ्घस्स पत्तकल्लं, वत्थुञ्च पुग्गलञ्च ठपेत्वा सङ्घो पवारेय्या’’ति. सो एवमस्स वचनीयो – ‘‘भगवता खो, आवुसो, विसुद्धानञ्च समग्गानञ्च पवारणा पञ्ञत्ता. सचे वत्थु च पुग्गलो च पञ्ञायति, इदानेव नं वदेही’’ति.

पुब्बे चे, भिक्खवे, पवारणाय वत्थु पञ्ञायति, पच्छा पुग्गलो, कल्लं वचनाय. पुब्बे चे, भिक्खवे, पवारणाय पुग्गलो पञ्ञायति, पच्छा वत्थु, कल्लं वचनाय. पुब्बे चे, भिक्खवे, पवारणाय वत्थु च पुग्गलो च पञ्ञायति, तं चे कताय पवारणाय उक्कोटेति, उक्कोटनकं पाचित्तियन्ति.

वत्थुठपनादि निट्ठिता.