१२२. पवारणादानानुजानना

२१३. अथ खो भगवा भिक्खू आमन्तेसि – ‘‘सन्निपतथ, भिक्खवे. सङ्घो पवारेस्सती’’ति. एवं वुत्ते अञ्ञतरो भिक्खु भगवन्तं एतदवोच – ‘‘अत्थि, भन्ते, भिक्खु गिलानो, सो अनागतो’’ति. अनुजानामि, भिक्खवे, गिलानेन भिक्खुना पवारणं दातुं. एवञ्च पन, भिक्खवे, दातब्बा – तेन गिलानेन भिक्खुना एकं भिक्खुं उपसङ्कमित्वा एकंसं उत्तरासङ्गं करित्वा उक्कुटिकं निसीदित्वा अञ्जलिं पग्गहेत्वा एवमस्स वचनीयो – ‘‘पवारणं दम्मि, पवारणं मे हर, पवारणं मे आरोचेहि, ममत्थाय पवारेही’’ति कायेन विञ्ञापेति, वाचाय विञ्ञापेति, कायेन वाचाय विञ्ञापेति, दिन्ना होति पवारणा; न कायेन विञ्ञापेति, न वाचाय विञ्ञापेति, न कायेन वाचाय विञ्ञापेति, न दिन्ना होति पवारणा. एवञ्चेतं लभेथ, इच्चेतं कुसलं. नो चे लभेथ, सो, भिक्खवे, गिलानो भिक्खु मञ्चेन वा पीठेन वा सङ्घमज्झे आनेत्वा पवारेतब्बं. सचे, भिक्खवे, गिलानुपट्ठाकानं भिक्खूनं एतदहोसि – ‘‘सचे खो मयं गिलानं ठाना चावेस्साम, आबाधो वा अभिवड्ढिस्सति, कालंकिरिया वा भविस्सती’’ति न, भिक्खवे, गिलानो भिक्खु ठाना चावेतब्बो. सङ्घेन तत्थ गन्त्वा पवारेतब्बं; न त्वेव वग्गेन सङ्घेन पवारेतब्बं. पवारेय्य चे, आपत्ति दुक्कटस्स.

पवारणहारको [पवारणाहारको (स्या.)] चे, भिक्खवे, दिन्नाय पवारणाय तत्थेव पक्कमति, अञ्ञस्स दातब्बा पवारणा. पवारणहारको चे, भिक्खवे, दिन्नाय पवारणाय तत्थेव विब्भमति…पे… कालंकरोति… सामणेरो पटिजानाति… सिक्खं पच्चक्खातको पटिजानाति… अन्तिमवत्थुं अज्झापन्नको पटिजानाति… उम्मत्तको पटिजानाति… खित्तचित्तो पटिजानाति… वेदनाट्टो पटिजानाति… आपत्तिया अदस्सने उक्खित्तको पटिजानाति… आपत्तिया अप्पटिकम्मे उक्खित्तको पटिजानाति… पापिकाय दिट्ठिया अप्पटिनिस्सग्गे उक्खित्तको पटिजानाति… पण्डको पटिजानाति… थेय्यसंवासको पटिजानाति… तित्थियपक्कन्तको पटिजानाति… तिरच्छानगतो पटिजानाति… मातुघातको पटिजानाति… पितुघातको पटिजानाति… अरहन्तघातको पटिजानाति… भिक्खुनिदूसको पटिजानाति… सङ्घभेदको पटिजानाति … लोहितुप्पादको पटिजानाति… उभतोब्यञ्जनको पटिजानाति, अञ्ञस्स दातब्बा पवारणा.

पवारणहारको चे, भिक्खवे, दिन्नाय पवारणाय अन्तरामग्गे पक्कमति, अनाहटा होति पवारणा. पवारणहारको चे, भिक्खवे, दिन्नाय पवारणाय अन्तरामग्गे विब्भमति…पे… कालंकरोति… सामणेरो पटिजानाति… सिक्खं पच्चक्खातको पटिजानाति… अन्तिमवत्थुं अज्झापन्नको पटिजानाति… उम्मत्तको पटिजानाति… खित्तचित्तो पटिजानाति… वेदनाट्टो पटिजानाति… आपत्तिया अदस्सने उक्खित्तको पटिजानाति… आपत्तिया अप्पटिकम्मे उक्खित्तको पटिजानाति… पापिकाय दिट्ठिया अप्पटिनिस्सग्गे उक्खित्तको पटिजानाति… पण्डको पटिजानाति… थेय्यसंवासको पटिजानाति… तित्थियपक्कन्तको पटिजानाति… तिरच्छानगतो पटिजानाति… मातुघातको पटिजानाति… पितुघातको पटिजानाति… अरहन्तघातको पटिजानाति… भिक्खुनिदूसको पटिजानाति… सङ्घभेदको पटिजानाति… लोहितुप्पादको पटिजानाति… उभतोब्यञ्जनको पटिजानाति, अनाहटा होति पवारणा.

पवारणहारको चे, भिक्खवे, दिन्नाय पवारणाय सङ्घप्पत्तो पक्कमति, आहटा होति पवारणा. पवारणहारको चे, भिक्खवे, दिन्नाय पवारणाय सङ्घप्पत्तो विब्भमति…पे… कालंकरोति… सामणेरो पटिजानाति… सिक्खं पच्चक्खातको पटिजानाति… अन्तिमवत्थुं अज्झापन्नको पटिजानाति… उम्मत्तको पटिजानाति… खित्तचित्तो पटिजानाति… वेदनाट्टो पटिजानाति… आपत्तिया अदस्सने उक्खित्तको पटिजानाति… आपत्तिया अप्पटिकम्मे उक्खित्तको पटिजानाति… पापिकाय दिट्ठिया अप्पटिनिस्सग्गे उक्खित्तको पटिजानाति… पण्डको पटिजानाति… थेय्यसंवासको पटिजानाति… तित्थियपक्कन्तको पटिजानाति… तिरच्छानगतो पटिजानाति… मातुघातको पटिजानाति… पितुघातको पटिजानाति… अरहन्तघातको पटिजानाति… भिक्खुनिदूसको पटिजानाति… सङ्घभेदको पटिजानाति… लोहितुप्पादको पटिजानाति… उभतोब्यञ्जनको पटिजानाति, आहटा होति पवारणा.

पवारणहारको चे, भिक्खवे, दिन्नाय पवारणाय सङ्घप्पत्तो सुत्तो नारोचेति, आहटा होति पवारणा. पवारणहारकस्स अनापत्ति. पवारणहारको चे, भिक्खवे, दिन्नाय पवारणाय सङ्घप्पत्तो पमत्तो नारोचेति…पे… समापन्नो नारोचेति, आहटा होति पवारणा. पवारणहारकस्स अनापत्ति.

पवारणहारको चे, भिक्खवे, दिन्नाय पवारणाय सङ्घप्पत्तो सञ्चिच्च नारोचेति, आहटा होति पवारणा. पवारणहारकस्स आपत्ति दुक्कटस्स. अनुजानामि, भिक्खवे, तदहु पवारणाय पवारणं देन्तेन छन्दम्पि दातुं, सन्ति सङ्घस्स करणीयन्ति.

पवारणादानानुजानना निट्ठिता.