१२१. पवारणाभेदा

२१२. अथ खो भिक्खूनं एतदहोसि – ‘‘कति नु खो पवारणा’’ति? भगवतो एतमत्थं आरोचेसुं. द्वेमा, भिक्खवे, पवारणा – चातुद्दसिका च पन्नरसिका च. इमा खो, भिक्खवे, द्वे पवारणाति.

अथ खो भिक्खूनं एतदहोसि – ‘‘कति नु खो पवारणकम्मानी’’ति? [पवारणाकम्मानीति (स्या.)] भगवतो एतमत्थं आरोचेसुं. चत्तारिमानि, भिक्खवे, पवारणकम्मानि – अधम्मेन वग्गं पवारणकम्मं, अधम्मेन समग्गं पवारणकम्मं, धम्मेन वग्गं पवारणकम्मं, धम्मेन समग्गं पवारणकम्मं. तत्र, भिक्खवे, यदिदं अधम्मेन वग्गं पवारणकम्मं, न, भिक्खवे, एवरूपं पवारणकम्मं कातब्बं; न च मया एवरूपं पवारणकम्मं अनुञ्ञातं. तत्र, भिक्खवे, यदिदं अधम्मेन समग्गं पवारणकम्मं, न, भिक्खवे, एवरूपं पवारणकम्मं कातब्बं; न च मया एवरूपं पवारणकम्मं अनुञ्ञातं. तत्र, भिक्खवे, यदिदं धम्मेन वग्गं पवारणकम्मं, न, भिक्खवे, एवरूपं पवारणकम्मं कातब्बं; न च मया एवरूपं पवारणकम्मं अनुञ्ञातं. तत्र, भिक्खवे, यदिदं धम्मेन समग्गं पवारणकम्मं, एवरूपं, भिक्खवे, पवारणकम्मं कातब्बं; एवरूपञ्च मया पवारणकम्मं अनुञ्ञातं. तस्मातिह, भिक्खवे, एवरूपं पवारणकम्मं करिस्साम यदिदं धम्मेन समग्गन्ति, एवञ्हि वो, भिक्खवे, सिक्खितब्बन्ति.

पवारणाभेदा निट्ठिता.