१०१. लिङ्गादिदस्सनं

१७९. इध पन, भिक्खवे, आगन्तुका भिक्खू पस्सन्ति आवासिकानं भिक्खूनं आवासिकाकारं, आवासिकलिङ्गं, आवासिकनिमित्तं, आवासिकुद्देसं, सुपञ्ञत्तं मञ्चपीठं, भिसिबिब्बोहनं, पानीयं परिभोजनीयं सूपट्ठितं, परिवेणं सुसम्मट्ठं; पस्सित्वा वेमतिका होन्ति – ‘‘अत्थि नु खो आवासिका भिक्खू नत्थि नु खो’’ति. ते वेमतिका न विचिनन्ति; अविचिनित्वा उपोसथं करोन्ति. आपत्ति दुक्कटस्स. ते वेमतिका विचिनन्ति; विचिनित्वा न पस्सन्ति; अपस्सित्वा उपोसथं करोन्ति. अनापत्ति. ते वेमतिका विचिनन्ति; विचिनित्वा पस्सन्ति; पस्सित्वा एकतो उपोसथं करोन्ति. अनापत्ति. ते वेमतिका विचिनन्ति; विचिनित्वा पस्सन्ति; पस्सित्वा पाटेक्कं उपोसथं करोन्ति. आपत्ति दुक्कटस्स. ते वेमतिका विचिनन्ति; विचिनित्वा पस्सन्ति; पस्सित्वा – ‘‘नस्सन्तेते, विनस्सन्तेते, को तेहि अत्थो’’ति – भेदपुरेक्खारा उपोसथं करोन्ति. आपत्ति थुल्लच्चयस्स.

इध पन, भिक्खवे, आगन्तुका भिक्खू सुणन्ति आवासिकानं भिक्खूनं आवासिकाकारं, आवासिकलिङ्गं, आवासिकनिमित्तं, आवासिकुद्देसं, चङ्कमन्तानं पदसद्दं, सज्झायसद्दं, उक्कासितसद्दं, खिपितसद्दं; सुत्वा वेमतिका होन्ति – ‘‘अत्थि नु खो आवासिका भिक्खू नत्थि नु खो’’ति. ते वेमतिका न विचिनन्ति; अविचिनित्वा उपोसथं करोन्ति. आपत्ति दुक्कटस्स. ते वेमतिका विचिनन्ति; विचिनित्वा न पस्सन्ति; अपस्सित्वा उपोसथं करोन्ति. अनापत्ति. ते वेमतिका विचिनन्ति; विचिनित्वा पस्सन्ति; पस्सित्वा एकतो उपोसथं करोन्ति. अनापत्ति. ते वेमतिका विचिनन्ति; विचिनित्वा पस्सन्ति; पस्सित्वा पाटेक्कं उपोसथं करोन्ति. आपत्ति दुक्कटस्स. ते वेमतिका विचिनन्ति; विचिनित्वा पस्सन्ति; पस्सित्वा – ‘‘नस्सन्तेते, विनस्सन्तेते, को तेहि अत्थो’’ति – भेदपुरेक्खारा उपोसथं करोन्ति. आपत्ति थुल्लच्चयस्स.

इध पन, भिक्खवे, आवासिका भिक्खू पस्सन्ति आगन्तुकानं भिक्खूनं आगन्तुकाकारं, आगन्तुकलिङ्गं, आगन्तुकनिमित्तं, आगन्तुकुद्देसं, अञ्ञातकं पत्तं, अञ्ञातकं चीवरं, अञ्ञातकं निसीदनं, पादानं धोतं, उदकनिस्सेकं; पस्सित्वा वेमतिका होन्ति – ‘‘अत्थि नु खो आगन्तुका भिक्खू नत्थि नु खो’’ति. ते वेमतिका न विचिनन्ति; अविचिनित्वा उपोसथं करोन्ति. आपत्ति दुक्कटस्स. ते वेमतिका विचिनन्ति; विचिनित्वा न पस्सन्ति; अपस्सित्वा उपोसथं करोन्ति. अनापत्ति. ते वेमतिका विचिनन्ति; विचिनित्वा पस्सन्ति; पस्सित्वा एकतो उपोसथं करोन्ति. अनापत्ति. ते वेमतिका विचिनन्ति; विचिनित्वा पस्सन्ति; पस्सित्वा पाटेक्कं उपोसथं करोन्ति. आपत्ति दुक्कटस्स. ते वेमतिका विचिनन्ति; विचिनित्वा पस्सन्ति; पस्सित्वा – ‘‘नस्सन्तेते, विनस्सन्तेते, को तेहि अत्थो’’ति – भेदपुरेक्खारा उपोसथं करोन्ति. आपत्ति थुल्लच्चयस्स.

इध पन, भिक्खवे, आवासिका भिक्खू सुणन्ति आगन्तुकानं भिक्खूनं आगन्तुकाकारं, आगन्तुकलिङ्गं, आगन्तुकनिमित्तं, आगन्तुकुद्देसं, आगच्छन्तानं पदसद्दं, उपाहनपप्फोटनसद्दं, उक्कासितसद्दं, खिपितसद्दं; सुत्वा वेमतिका होन्ति – ‘‘अत्थि नु खो आगन्तुका भिक्खू नत्थि नु खो’’ति. ते वेमतिका न विचिनन्ति; अविचिनित्वा उपोसथं करोन्ति. आपत्ति दुक्कटस्स. ते वेमतिका विचिनन्ति; विचिनित्वा न पस्सन्ति; अपस्सित्वा उपोसथं करोन्ति. अनापत्ति. ते वेमतिका विचिनन्ति; विचिनित्वा पस्सन्ति; पस्सित्वा एकतो उपोसथं करोन्ति. अनापत्ति. ते वेमतिका विचिनन्ति; विचिनित्वा पस्सन्ति; पस्सित्वा पाटेक्कं उपोसथं करोन्ति. आपत्ति दुक्कटस्स. ते वेमतिका विचिनन्ति; विचिनित्वा पस्सन्ति; पस्सित्वा – ‘‘नस्सन्तेते, विनस्सन्तेते, को तेहि अत्थो’’ति – भेदपुरेक्खारा उपोसथं करोन्ति. आपत्ति थुल्लच्चयस्स.

लिङ्गादिदस्सनं निट्ठितं.