४६. कण्टकसामणेरवत्थु

तेन खो पन समयेन आयस्मतो उपनन्दस्स सक्यपुत्तस्स कण्टको नाम सामणेरो कण्टकिं नाम भिक्खुनिं दूसेसि. भिक्खू उज्झायन्ति खिय्यन्ति विपाचेन्ति – ‘‘कथञ्हि नाम सामणेरो एवरूपं अनाचारं आचरिस्सती’’ति. भगवतो एतमत्थं आरोचेसुं. अनुजानामि, भिक्खवे, दसहङ्गेहि समन्नागतं सामणेरं नासेतुं. पाणातिपाती होति, अदिन्नादायी होति, अब्रह्मचारी होति, मुसावादी होति, मज्जपायी होति, बुद्धस्स अवण्णं भासति, धम्मस्स अवण्णं भासति, सङ्घस्स अवण्णं भासति, मिच्छादिट्ठिको होति, भिक्खुनिदूसको होति – अनुजानामि, भिक्खवे, इमेहि दसहङ्गेहि समन्नागतं सामणेरं नासेतुन्ति.