२७. राजभटवत्थु

९०. तेन खो पन समयेन रञ्ञो मागधस्स सेनियस्स बिम्बिसारस्स पच्चन्तो कुपितो होति. अथ खो राजा मागधो सेनियो बिम्बिसारो सेनानायके महामत्ते आणापेसि – ‘‘गच्छथ, भणे, पच्चन्तं उच्चिनथा’’ति. ‘‘एवं, देवा’’ति खो सेनानायका महामत्ता रञ्ञो मागधस्स सेनियस्स बिम्बिसारस्स पच्चस्सोसुं. अथ खो अभिञ्ञातानं अभिञ्ञातानं योधानं एतदहोसि – ‘‘मयं खो युद्धाभिनन्दिनो गच्छन्ता पापञ्च करोम, बहुञ्च अपुञ्ञं पसवाम. केन नु खो मयं उपायेन पापा च विरमेय्याम कल्याणञ्च करेय्यामा’’ति? अथ खो तेसं योधानं एतदहोसि – ‘‘इमे खो समणा सक्यपुत्तिया धम्मचारिनो समचारिनो ब्रह्मचारिनो सच्चवादिनो सीलवन्तो कल्याणधम्मा. सचे खो मयं समणेसु सक्यपुत्तियेसु पब्बजेय्याम, एवं मयं पापा च विरमेय्याम कल्याणञ्च करेय्यामा’’ति. अथ खो ते योधा भिक्खू उपसङ्कमित्वा पब्बज्जं याचिंसु. ते भिक्खू पब्बाजेसुं, उपसम्पादेसुं. सेनानायका महामत्ता राजभटे पुच्छिंसु – ‘‘किं नु खो, भणे, इत्थन्नामो च इत्थन्नामो च योधा न दिस्सन्ती’’ति? ‘‘इत्थन्नामो च इत्थन्नामो च, सामि, योधा भिक्खूसु पब्बजिता’’ति. सेनानायका महामत्ता उज्झायन्ति खिय्यन्ति विपाचेन्ति – ‘‘कथञ्हि नाम समणा सक्यपुत्तिया राजभटं पब्बाजेस्सन्ती’’ति. सेनानायका महामत्ता रञ्ञो मागधस्स सेनियस्स बिम्बिसारस्स एतमत्थं आरोचेसुं. अथ खो राजा मागधो सेनियो बिम्बिसारो वोहारिके महामत्ते पुच्छि – ‘‘यो, भणे, राजभटं पब्बाजेति, किं सो पसवती’’ति? ‘‘उपज्झायस्स, देव, सीसं छेतब्बं, अनुस्सावकस्स [अनुसावकस्स (क.)] जिव्हा उद्धरितब्बा, गणस्स उपड्ढफासुका भञ्जितब्बा’’ति. अथ खो राजा मागधो सेनियो बिम्बिसारो येन भगवा तेनुपसङ्कमि, उपसङ्कमित्वा भगवन्तं अभिवादेत्वा एकमन्तं निसीदि. एकमन्तं निसिन्नो खो राजा मागधो सेनियो बिम्बिसारो भगवन्तं एतदवोच – ‘‘सन्ति, भन्ते, राजानो अस्सद्धा अप्पसन्ना. ते अप्पमत्तकेनपि भिक्खू विहेठेय्युं. साधु, भन्ते, अय्या राजभटं न पब्बाजेय्यु’’न्ति. अथ खो भगवा राजानं मागधं सेनियं बिम्बिसारं धम्मिया कथाय सन्दस्सेसि समादपेसि समुत्तेजेसि सम्पहंसेसि. अथ खो राजा मागधो सेनियो बिम्बिसारो भगवता धम्मिया कथाय सन्दस्सितो समादपितो समुत्तेजितो सम्पहंसितो उट्ठायासना भगवन्तं अभिवादेत्वा पदक्खिणं कत्वा पक्कामि. अथ खो भगवा एतस्मिं निदाने एतस्मिं पकरणे धम्मिं कथं कत्वा भिक्खू आमन्तेसि – ‘‘न, भिक्खवे, राजभटो पब्बाजेतब्बो. यो पब्बाजेय्य, आपत्ति दुक्कटस्सा’’ति.

राजभटवत्थु निट्ठितं.