४. छत्तिंसकं

१६५. ‘‘इध पन, भिक्खवे, भिक्खु परिवसन्तो अन्तरा सम्बहुला सङ्घादिसेसा आपत्तियो आपज्जति परिमाणा [परिमाणायो (सी. स्या.)] अप्पटिच्छन्नायो. सो भिक्खु मूलाय पटिकस्सितब्बो.

‘‘इध पन, भिक्खवे, भिक्खु परिवसन्तो अन्तरा सम्बहुला सङ्घादिसेसा आपत्तियो आपज्जति परिमाणा पटिच्छन्नायो. सो भिक्खु मूलाय पटिकस्सितब्बो. यथापटिच्छन्नानञ्चस्स आपत्तीनं पुरिमाय आपत्तिया समोधानपरिवासो दातब्बो.

‘‘इध पन, भिक्खवे, भिक्खु परिवसन्तो अन्तरा सम्बहुला सङ्घादिसेसा आपत्तियो आपज्जति परिमाणा पटिच्छन्नायोपि अप्पटिच्छन्नायोपि. सो भिक्खु मूलाय पटिकस्सितब्बो. यथापटिच्छन्नानञ्चस्स आपत्तीनं पुरिमाय आपत्तिया समोधानपरिवासो दातब्बो.

‘‘इध पन, भिक्खवे, भिक्खु परिवसन्तो अन्तरा सम्बहुला सङ्घादिसेसा आपत्तियो आपज्जति अपरिमाणा [अपरिमाणायो (सी. स्या.)] अप्पटिच्छन्नायो…पे… अपरिमाणा पटिच्छन्नायो…पे… अपरिमाणा पटिच्छन्नायोपि अप्पटिच्छन्नायोपि…पे… परिमाणायोपि अपरिमाणायोपि अप्पटिच्छन्नायो…पे… परिमाणायोपि अपरिमाणायोपि पटिच्छन्नायो…पे… परिमाणायोपि अपरिमाणायोपि पटिच्छन्नायोपि अप्पटिच्छन्नायोपि. सो भिक्खु मूलाय पटिकस्सितब्बो. यथापटिच्छन्नानञ्चस्स आपत्तीनं पुरिमाय आपत्तिया समोधानपरिवासो दातब्बो.

‘‘इध पन, भिक्खवे, भिक्खु मानत्तारहो…पे… मानत्तं चरन्तो…पे… (यथापरिवासं तथा वित्थारेतब्बं) अब्भानारहो अन्तरा सम्बहुला सङ्घादिसेसा आपत्तियो आपज्जति परिमाणा अप्पटिच्छन्नायो…पे… परिमाणा पटिच्छन्नायो…पे… परिमाणा पटिच्छन्नायोपि अप्पटिच्छन्नायोपि…पे… अपरिमाणा अप्पटिच्छन्नायो…पे… अपरिमाणा पटिच्छन्नायो…पे… अपरिमाणा पटिच्छन्नायोपि अप्पटिच्छन्नायोपि…पे… परिमाणायोपि अपरिमाणायोपि अप्पटिच्छन्नायो…पे… परिमाणायोपि अपरिमाणायोपि पटिच्छन्नायो…पे… परिमाणायोपि अपरिमाणायोपि पटिच्छन्नायोपि अप्पटिच्छन्नायोपि. सो भिक्खु मूलाय पटिकस्सितब्बो. यथापटिच्छन्नानञ्चस्स आपत्तीनं पुरिमाय आपत्तिया समोधानपरिवासो दातब्बो.

छत्तिंसकं समत्तं.