१४. विपाकपच्चयनिद्देसवण्णना

१४. यथा हि रूपभवे सञ्ञीनं तंनिब्बत्तितपुञ्ञाभिसङ्खारेनेव रूपुप्पत्ति, एवं असञ्ञीनम्पीति तत्थ कामावचरकम्मुना यथा विपाकानुरूपानं पच्चयो होन्तो केसञ्चियेव होति, न सब्बेसं, कत्थचियेव होति, न सब्बत्थ, न एवं विपाकानन्ति आह ‘‘एकन्तेना’’ति. तेसं वसेनाति तेसं विपाकपच्चयलाभीनं विपाकक्खन्धानं वसेन. न हीतिआदिना ‘‘एकन्तेना’’ति वुत्तमत्थं ब्यतिरेकतो विभावेति. भूमिद्वयविपाकोति कामावचररूपावचरविपाको आरुप्पे रूपस्स न हि पच्चयोति योजना.

विपाकपच्चयनिद्देसवण्णना निट्ठिता.