११. पच्छाजातपच्चयनिद्देसवण्णना

११. निरवसेसदस्सितपुरेजातदस्सनवसेनाति ‘‘चतुसमुट्ठानिकतिसमुट्ठानिकरूपकायस्सा’’ति एवं निरवसेसतो दस्सितस्स पुरेजातस्स पच्चयुप्पन्नस्स दस्सनवसेन. पच्चया हि इध कामावचररूपावचरविपाका, तेसु कामावचरविपाको च चतुसमुट्ठानिकरूपकायस्स पच्चयो, न इतरो. तेनेवाह ‘‘रूपावचरविपाको पन आहारसमुट्ठानस्स न होती’’ति, तस्मा ‘‘तस्सेवा’’ति वुत्तेपि यथारहमत्थो वेदितब्बो.

पच्छाजातपच्चयनिद्देसवण्णना निट्ठिता.