१०. सब्बसंयोजनप्पहानकथावण्णना

४१३. सतिपि केसञ्चि संयोजनानं हेट्ठिममग्गेहि पहीनत्ते ‘‘पञ्चन्नं ओरम्भागियानं संयोजनानं परिक्खया’’तिआदीसु विय वण्णभणनमुखेन अनवसेसतञ्च सन्धाय सब्बसंयोजनप्पहानकित्तनं परियायवचनन्ति आह ‘‘इमं परियायं अग्गहेत्वा’’ति. अरहत्तमग्गेन पजहनतो एवाति गण्हातीति अग्गमग्गो एव सब्बसंयोजनानि पजहतीति लद्धिं गण्हातीति वदन्ति पदकारा. एवं सतीति यदि अनवसेसतामत्तेन तथा पटिजानाति.

सब्बसंयोजनप्पहानकथावण्णना निट्ठिता.

चतुत्थवग्गवण्णना निट्ठिता.