३. अनन्तरपच्चयकथावण्णना

६९३-६९७. अनन्तरुप्पत्तिं सल्लक्खेन्तोति चक्खुविञ्ञाणानन्तरं सोतविञ्ञाणुप्पत्तिं मञ्ञमानो. सोतविञ्ञाणन्ति वचनेनेव तस्स चक्खुसन्निस्सयता रूपारम्मणता च पटिक्खित्ता, पटिञ्ञाता च सोतसन्निस्सयता सद्दारम्मणता चाति आह ‘‘न सो चक्खुम्हि सद्दारम्मण’’न्ति. तत्थ सद्दारम्मणन्ति ‘‘सोतविञ्ञाणं इच्छती’’ति आनेत्वा सम्बन्धितब्बं. तयिदं चक्खुविञ्ञाणस्स अनन्तरं सोतविञ्ञाणं उप्पज्जतीति लद्धिया एवं ञायतीति आह ‘‘अनन्तरूपलद्धिवसेन आपन्नत्ता’’ति.

अनन्तरपच्चयकथावण्णना निट्ठिता.