१०. अनिच्चताकथावण्णना

६२८. रूपादीनं अनिच्चता रूपादिके सति होति, असति न होतीति इमिना परियायेन तस्सा तेहि सह उप्पादनिरोधो वुत्तो, उप्पादादीसु तीसु लक्खणेसु अनिच्चतावोहारो होतीति यथा तयो दण्डे उपादाय पवत्तो तिदण्डवोहारो तेसु सब्बेसु होति, एवं जातिजरामरणधम्मो न निच्चो अनिच्चो, तस्स जातिआदिपकतिता अनिच्चतासद्देन वुच्चतीति उप्पादादीसु लक्खणेसु अनिच्चतावोहारो सम्भवतीति वुत्तं ‘‘तीसु…पे… होती’’ति. विभागानुयुञ्जनवसेनाति पभेदानुयुञ्जनवसेन. तत्थ यथा जराभङ्गवसेन अनिच्चता पाकटा होति, न तथा जातिवसेनाति पाळियं जरामरणवसेनेव अनिच्चताविभागो दस्सितोति दट्ठब्बं.

अनिच्चताकथावण्णना निट्ठिता.

एकादसमवग्गवण्णना निट्ठिता.