३. रूपंसारम्मणन्तिकथावण्णना

५५२-५५३. ‘‘तदप्पतिट्ठं अनारम्मण’’न्तिआदीसु पच्चयत्थो आरम्मण-सद्दो. ‘‘रूपायतनं चक्खुविञ्ञाणधातुया तंसम्पयुत्तकानञ्च धम्मानं आरम्मणपच्चयेन पच्चयो’’तिआदीसु ओलुब्भट्ठोति आह ‘‘पच्चयट्ठो ओलुब्भट्ठो’’ति. एवं विभागे विज्जमानेति तत्थ पच्चयायत्तवुत्तिता पच्चयट्ठो, दण्डरज्जुआदि विय दुब्बलस्स चित्तचेतसिकानं आलम्बितब्बताय उपत्थम्भनट्ठो ओलुब्भट्ठो. विसेसाभावं पच्चयभावसामञ्ञेन कप्पेत्वा वा.

रूपंसारम्मणन्तिकथावण्णना निट्ठिता.