८. अट्ठमनयो विप्पयुत्तेनसम्पयुत्तपदवण्णना

३१७. रूपक्खन्धेन विप्पयुत्ता नाम चत्तारो अरूपिनो खन्धा, तेसं अञ्ञेहि सम्पयोगो नाम नत्थि तादिसस्स अञ्ञस्स सम्पयोगिनो अभावतो. समुदायस्स च एकदेसेन सम्पयोगो नत्थीति वुत्तोवायमत्थो. वेदनाक्खन्धादीहि विप्पयुत्तं रूपं निब्बानञ्च, तस्स केनचि सम्पयोगो नत्थेवाति आह ‘‘रूपक्खन्धादीहि…पे… नत्थी’’ति. तेनाति ‘‘रूपक्खन्धेन ये धम्मा विप्पयुत्ता’’तिआदिवचनेन.

अट्ठमनयविप्पयुत्तेनसम्पयुत्तपदवण्णना निट्ठिता.